Zeydan ji Rûdawê re got: Em dê heta dawiyê îradeya xelkê Wanê biparêzin

Hewlêr (Rûdaw) - Hevserokê Şaredariya Bajarê Mezin a Wanê Abdullah Zeydan debarê cezayê lê hatiye birîn got ku biryara dadgehê bi fermana desthilata AK Partî û MHPyê hatiye dayîn û ew dixwazin careke din îradeya gelê Wanê desteser bikin.

Îro li Dadgeha 5emîn a Cezayê Giran a Amedê, rûniştina doza Hevserokê Şaredariya Bajarê Mezin a Wanê Abdullah Zeydan hat lidarxistin.

Abdullah Zeydan beşdarî dozê nebû û bi îdiaya "alîkarîya rêxistinê" hat darizandin.

Dadgehê, bi îdiaya “Bi zanebûn û bi dilxwazî alîkarî daye rêxistinê” 3 sal û 6 meh cezayê girtîgehê li Zeydan birî.

Zeydan têkildarî vê biryarê ji Rûdawê re axivî û got ku li Tirkiyeyê dadgeh û edalet nemaye.

“Gelê me şaredariyên xwe 31ê Adarê ji qeyûm rizgar kirin”

Zeydan û got, “10 meh in em li vê derê ne û gelê me şaredariyên xwe 31ê Adarê ji qeyûm rizgar kirin û bi dengên xwe li hemberî zilma AKPyê bersiveke dîrokî da."

Hevserokê Şaredariya Wanê destnîşan kir ku armanca desthilatê ew e ku bi "lîstokên hiqûqî" careke din îradeya xelkê desteser bike û got:

"Ewên ku bi sindoq û bi rêya demokrasiyê neşiya gelê Wanê bişikînin, niha dixwazin bi lîstokên hiqûqê careke din îradeya xelkê Wanê xesb bikin û dizî û talanên xwe berdewam bikin."

"Me soz daye gelê xwe”

Zeydan amaje pê kir ku ew dê heta dawiyê îradeya xelkê xwe biparêzin û wiha domand:

"Me soz daye gelê xwe û em dê heta dawiyê îradeya wan biparêzin. Gelê me jî di wê hişmendiyê de ku dê heta dawiyê îradeya xwe biparêze.

Ew diz û talankar bila vî hesaban ji xwe re nekin ku ew dê karibin îradeya gelê Wanê xesb bikin û kes dê dengê xwe dernexe.

Dinyayek û hişmendiyeke wiha nîne û em dê heta dawiyê bi xelkê xwe re li îradeya xwe xwedî derkevin û li hemberî vê zilmê li ber xwe bidin."

#VÎDEO - Hevserokê Şaredariya Bajarê Mezin a Wanê Abdullah Zeydan ji Rûdawê re got:

🎙️ Dadgeh, hiqûq û edalet nînin

🎙️ Ev biryar bi emrê AKP û MHPyê hat dayîn

🎙️ Gelê me bersiveke dîrokî da zilma AKPyê

🎙️ Dixwazin îradeya Wanê xesp bikin û dizî û talana xwe bidomînin

🎙️ Ew… pic.twitter.com/bIOT50d4sr

— RudawKurdi (@RudawKurdi) February 11, 2025