Hewlêr (Rûdaw)- Zêdetirî 12 hezar çavdêrên partiyên siyasî û rêxistinên navxwe û navneteweyî dê çavdêriya pêvojoya hilbijartinên Parlamentoya Kurdistanê bikin.
Komîsyona Bilind a Serbixwe ya Hilbijartinan a Îraqê hejmara dawî ya nûnerên partî, rêxistin û konsulxaneyên siyasî yên ku dê çavdêriya hilbijartinên Parlamentoya Kurdistanê bikin eşkere kir.
Serokê Komîsyona Bilind a Serbixwe ya Hilbijartinan a Îraqê Hakim Umer Ehmed got:
"Komîsyona Bilind a Serbixwe ya Hilbijartinan amade ye û dawetname ji hemû rêxistin û konsulxaneyan re şandiye ku werin çavdêriya hilbijartinan bikin."
Li gorî amarên ku komîsyonê belav kirine 13 konsulxane, 17 rêxistin dê bi hezar û 372 çavdêr û 18 ajansên rojnamegeriyê yên navneteweyî tevî 75 rojnamegeran dê li navendên dengdanê hilbijartinan bişopînin.
Biryar e hilbijartinên Parlamentoya Kurdistanê 20ê Çiriya Pêşîna vê mehê werin kirin.
