Hewlêr (Rûdaw) - Îro 5 sal di ser dagirkirina bajarên Girê Spî û Serê Kaniyê yên Rojavayê Kurdistanê re derbas dibin.
Piştî derbasbûna 5 salan di ser dagirkirina bajarên Girê Spî û Serê Kaniyê re, koçberên ji her du bajaran li kampên Rojavayê Kurdistanê di reşweke gelekî dijwar de dijîn.
Bajarên Girê Spî û Serê Kaniyê yên Rojavayê Kurdistanê 9ê Çiriya Pêşîna 2019an ji aliyê Tirkiye û kom û komikên wê ve hatin dagirkirin.
Ji wê demê ve tawanên wekî destdirêjî, kuştin, revandin, nefîkirin û diziyê berdewam dikin.
Tirkiye û komikên wê yên çekdar Kurdan neçar dikin ku ji axa bav û kalên xwe derkevin û Ereb û Tirkmenan tînin cihê wan û bi vê yekê hewl didin demografiya wan bajaran biguherînin.
Dagirkirina Serê Kaniyê
- Ji ber êriş û dagirkirina bajarê Serê Kaniyê ji sedî 87 xelkê wê ango nêzikî 200 hezar kes koçber bûn.
- Niha tenê 45 Kurd li Serê Kaniyê mane ew jî zarok û pîr û kal in.
- 60 gund bi temamî ji xelkê wan ê resen hatine valakirin ku 15 ji wan gundên Êzidiyan in.
- Li şûna Kurd û Erebên Serê Kaniyê 3 hezar malbatên çekdaran, Erebên hawirde û 15 malbatên DAIŞê hatine bicihkirin.
- Wan dest danî ser 6 hezar mal û hezar û 700 dikanan.
- 5 gund hema bêjin bi temamî hatine wêrankirin û gundê Eyn Hîsanê jî bi temamî hatiye wêrankirin.
- Çarenivîsa 72 kesên hatine revandin ne diyar e û ti zanyarî ji wan nehatine wergirtin.
- Di 5 salan de li Serê Kaniyê 72 caran teqîn çêbûne.
🛑Serê Kaniyê û Girê Spî ji ber dagirkeran dinalin
— RudawKurdi (@RudawKurdi) October 9, 2024
🛑Dawî li girtin, şkence û revandinê nayê#Rojava pic.twitter.com/PwM6Y6eygC
Dagirkirina Girê Spiyê
- Ji ber êriş û dagirkirina bajarê Girê Spiyê 100 hezar kes koçber bûn.
- Ji 100 gundên Kurdan, 60 gund di bi bin dagirkeriyê de ne.
- Li şûna Kurdan hezar û 845 malbatên çekdaran û Erebên hawirde hatine bicihkirin.
- Li wî bajarî 75 kes hatin kuştin û 17 kes birîndar bûn û astengdar man.
- 89 kes hatin revandin.
- Kom û komikan dest danî ser 5 hezar û 171 mal, hezar û 180 dikan û 12 kargehan.
Ji wê roja ku Girê Spî û Serê Kaniyê ket bin dagirkirina artêşa Tirkiyeyê û grûpên çekdar ên mixalefeta Sûriyeyê û heta niha, binpêkariyên wekî dizî, talan, tecawiz, birîndarkirin, kuştin, revandin û şkencekirinên li hemberî Kurdên wê herêmê berdewam in.
Heta niha ji aliyê rêxistinên xwecihî û navneteweyî ve bi dehan binpêkariyên li dijî xelkê sivîl hatine tomarkirin ku ji aliyê çekdarên girêdayî Tirkiyeyê ve hatine kirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse