Hewlêr (Rûdaw) - Mesrûr Barzanî ji şandeya aboriyê ya Îraqê re got, "Eger îrade hebe, çareserkirina pirsgirêkan hêsan e."
Civîna lijneya aboriyê ya Îraq û Herêma Kurdistanê bi amadebûna Serokwezîrê Herêma Kurdistanê Mesrûr Barzanî li Hewlêrê hat lidarxistin.
Di civînê de Alîkarê Serokwezîr û serokê şandeya aboriyê ya girêdayî Serokwezîriya Îraqê Fuad Husên, Alîkarê Serokwezîrê Herêma Kurdistanê Qubad Talebanî û gelek wezîr û berpirsên pêwendîdar ên her du aliyan amade bûn.
Herwiha di civînê de her du alî li ser pirsgirêkên ku heta niha nehatine çareserkirin axivîn û tekezî li ser rêzgirtina mafên destûrî yên Herêma Kurdistanê hat kirin.
Hikûmeta Herêma Kurdistanê li ser civînê daxuyaniyek belav kir.
Li gorî daxuyaniyê, Mesrûr Barzanî got, “Eger xwestek û îradeya çareserkirinê hebe, çareserkirina pirsgirêkan hêsan e.
Divê rêzgirtina destûr û peymanan bibe bingeha çareserkirina hemû pirsgirêk û nakokiyan.”
"Divê hikûmeta federal bibe hikûmeta hemû herêm û parêzgehan"
Heriwha Serokêwezêrî Herêma Kurdistanê Mesrûr Barzanî got:
"Divê hikûmeta federal bi awayekî dadperwerane li hemû parçeyên Îraqê tevbigere û bibe hikûmeta hemû herêm û parêzgehan.
Çawa ku parastina mafên hemwelatiyên Besra û Bexdayê dike, divê bi heman awayî parastina mafên gelê Herêma Kurdistanê jî bike."
“Herêma Kurdistanê herêmeke destûrî ye”
Mesrûr Barzanî tekez kir ku Herêma Kurdistanê herêmeke destûrî ye û wiha pê de çû:
"Divê rêz li sîstema federalî ya Herêma Kurdistanê bê girtin û di vê çarçoveyê de serederî bi Herêma Kurdistanê re bê kirin.
Di daxuyaniyê de hat ragihandkin ku Alîkarê Serokwezîr û Serokê Encûmena Serokweziriyê ya Îraqê ya ji bo karûbarên aboriyê li ser giringî û pêwîstiya çareserkirina pirsgirêkên nehatine çareserkirin li ser bingeha destûrê hev ra bûn û “hatina vê şandeya bilind ji bo çareserkirina pirsgirêkan e.”
Piştre komîteyên pêwendîdar ên her du aliyan bi awayekî cuda li ser mijaran civiyan û nîqaşên berfireh kirin.
Tê plankirin ku hevdîtin du rojan berdewam bikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse