Hewlêr (Rûdaw) - Li Helebê êrişên komên girêdayî birêveberiya Şamê yên li taxên Kurdan dijwartir dibin. Hêzên asayîşê îdiayên "agirbestê" derewandin û hişyariya êrişeke berfireh da.
Hat diyarkirin ku di şerê doh êvarî de 8 kesan canê xwe ji dest daye û bi dehan kes jî birîndar bûne.
Li bajarê Helebê êrişên ku 6ê Kanûna Paşîn li taxên Şêxmeqsûd û Eşrefiyê yên ku Kurd lê dijîn dest pê kiribûn, di roja xwe ya duyem de bi bombebarana giran a li cihên sivîlan û êrişên dronan derbasî qonaxeke nû bûn.
Hêzên Ewlehiya Hundirîn ya Helebê (Asayîş) a girêdayî Rêveberiya Xweser, li ser rewşa dawî ya bajêr daxuyaniyek belav kir.
Asayîş: Nûçeyên agirbestê bêbingeh in, amadekariya êrişeke mezin heye
Navenda Ragihandinê ya Asayîşa Helebê êrişên komên çekdar ên wekî "Emşat" û "Hemzat" ên girêdayî hikûmeta Şamê wekî "hovane" pênase kirin.
Di daxuyaniyê de ev hûrgilî hatin parvekirin:
Li herêma Şiqêfê cihêkî sivîlan bi du mûşekan hat lêdan û li Taxa Rojava jî bazara gel bi dronên kamîkaze hat hedefgirtin.
Hêzên Asayîşê ragihand ku wan 4 êrişên li pey hev ên bi tank û wesayîtên zirxî şikandine.
Hişyariya dezenformasyonê
Di daxuyaniyê de hat tekezkirin ku nûçeyên "agirbest" an "arambûnê" yên li medyaya civakî tên belavkirin rastiyê nîşan nadin.
Asayîşê diyar kir ku ev nûçe ji bo "veşartina sûcên komên girêdayî Şamê" û "xapandina raya giştî ya beriya êrişeke mezin" tên belavkirin.
Sîstema tenduristiyê hilweşiya
Meclisa Tenduristiyê ya Şêxmeqsûd û Eşrefiyeyê daxuyaniyek da Tora Medyayî ya Rûdawê û diyar kir ku Nexweşxaneya Osman a ku navenda herî girîng a tenduristiyê ya herêmê ye, ji ber topbaranê bi temamî ji kar ketiye.
Hat ragihandin ku di topbaran û şer de 8 kesan canê xwe ji dest daye û hejmara birîndaran derketiye 57an.
Daxuyaniya Wezareta Navxwe ya Sûriyeyê
Li aliyê din Wezareta Karên Navxwe ya Sûriyeyê jî derbarê rewşa Helebê de daxuyaniyek belav kir.
Wezaretê îdia kir ku Hêzên Sûriyeya Demokratîk (HSD) li nêzîkî çerxerêya Şêxanê ekîbên ewlehiyê yên ku hevaltiya sivîlan dikirin, kirine hedef.
Di daxuyaniyê de hat gotin ku di encama gulebarana topan de 3 endamên ewlehiyê birîndar bûne.
