Hewlêr (Rûdaw) - Kurdîxane Akademiyê ragihandiye ku dê 4 salan bûrsê bide xwendekarên îsal dest bi Beşa Ziman û Edebîyata/Çanda Kurdî bikin.
Dezgeha taybet a serbixwe ya fêrkirina zimanê kurdî Kurdîxane Akademîyê ragihand ku dê 4 salan bûrsê bide wan xwendekarên beşa Ziman û Edebîyata/Çanda Kurdî qezenç bikin.
Xwendekar dikarin di navbera 1 û 15ê Îlondê de serlêdanên xwe bikin.
Bernameya bûrsê ya Kurdîxane Akademîyê ji bo hemû xwendekarên ku li zanîngehên Tirkiye û Bakurê Kurdistanê di beşa Ziman û Edebîyata Kurdî de bi cih bûne derbasdar e.
Bername, di nav 4 salên xwendina lîsansê de piştgirîyeka maddî pêşkêş dike û armanc dike ku barê aborî yê xwendekaran sivik bike.
Tê payîn ku hûrgilîyên li ser pîvan û mercên serlêdanê di hefteyên pêş de bi daxuyanîyeka fermî bê parvekirin.
Lê belê li gorî daxuyanîya niha du şert hatine diayrkirin:
- Divê Beşa Ziman û Edebîyata/Çanda Kurdî qezenç kiribe
- Divê zanîngeha wî/wê ya yekem be wate berî niha beşeke din nexwendibe
Berpirsan diyar kiriye ku bûrs ne bi tenê bi piştgirîya maddî sînordar dimîne, her wiha ji bo projeyên akademîk û çandî yên xwendekaran jî rêberî wê bê dayîn.
Kurdîxane Akademî, li parêzgeha Mêrdînê wekî dibistana Kurdî ya online ji bo perwerdeya zimanê Kurdî sala 2024an hat vekirin û xebatên xwe berdewam dike.
Di bin banê vê dezgehê de nêzîkî 30 mamoste dixebitin.
