Hewlêr (Rûdaw) – Nexweşiya Lachmanyayê ji Helebê derbasî Minbica Rêveberiya Xweser a Rojavayê Kurdistanê jî bûye.
Nexweşiya Lachmanyayê wekî “Heba Salê û Heba Helebê” tê zanîn û nexweşî bi rêjeyeke berbiçav belav bûye.
Nexweşiya Lachmaniyayê bi rêya mêşekê derbasî mirovan dibe.
Li navçeya Minbicê ya Rêveberiya Xweser ev nexweşî belav bûye û Dezgeha Tenduristî û Jîngehê ya Rêveberiya Xweser a ji bo rê li ber nexweşiyê bigire dest bi kampanyaya dermankirinê herêmê kiriye.
Li gorî amaran, ji destpêka îsal ve û heta niha li Sûriyeyê derdora 9 hezar kesan bi Lachmanyayê ketine.
“Bandora derman li ser zarokan nîne”
Berpirsê Dezgeha Tendirustî û Jîngehê yê Rêveberiya Xweser Elaa el-Mewwas li ser kampanya dermankirinê wiha got:
“Em dermanê ICON S-10an bi kar tînin. Cihên ku me berê derman li wan reşandine aliyê Heyye yê û hêla Yastî bûn.
1ê Tîrmehê dermankirin wan herêman bi dawî bûbû.
Me 3yê Tîrmehê qonaxa duyem a kampanya rûbirûbûna bi Lachmanyayê re da destpêkirin. Em dê hemû derdora bajarê Minbicê derman bikin.
Piştî bikaranînê bi çend salan derket holê ku bandora derman li ser zakokan û jinan nîne.
Li gorî Rêxistina Tenduristiyê ya Cîhanî (WHO) nexweşiya Lachmanyayê bi rêya pêvedana mêşa qûmê peyda dibe.
Ev mêş bi ling û rûyê mirov ve dide û piştre nexweşî derbasî xwînê dibe û li ser çerm diyar dibe.
Salane li cîhanê, nêzîkî milyonek û 300 hezar kesî bi Lachmanyayê dikevin û derdora 20-30 hezar kes jî pê dimirin.
