Hewlêr (Rûdaw) - Lijneya Hilbijartinan a Tirkiyeyê (YSK) îtiraza DEM Partiyê qebûl kir û biryar da ku Abdullah Zeydan mazbatayê bistîne.
Piştî ku li Wanê mafê Abdullah Zeydan ê şaredarbûnê hat betalkirin û mazbata bi berbijêrê AKPyê yê Şaredariya Wanê hat dayîn li bajarê Wanê û li seranserê Bakurê Kurdistanê gelek çalakî û xwepêşandan hatin kirin.
Lijneya Hilbijartinan a Tirkiyeyê (YSK) piştî nerazîbûna xelkê û partiyên siyasî biryara Lijneya Hilbijartinan a Wanê betal kir.
YSKyê biryar da ku Hevserokê Şaredariya Bajarê Mezin a Wanê Abdullah Zeydan mazbatayê bistîne.
Parlamentera Wanê ya DEM Partiyê Gulderen Varliyê derbarê vegerandina mazbataya Abdullah Zeydan de ji Rûdawê re axivî û got:
“Xelkê Wanê, îradeya Wanê bi ser ket. YSK neçar bû ji biryara xwe vegere. Ev serkeftina gelê Wanê ye. Em dê heta dawiyê li îradeya xelkê Wanê xwedî derkevin.”
Hevserokê Giştî yê Partiya Gelan a Wekhevî û Demokrasiyê (DEM Partî) Tuncer Bakirhan li ser hesabê xwe yê tora civakî daxuyanî da.
Hevserokê DEM Partiyê Tuncer Bakirhan li ser biryara YSKyê got:
“Bijî gelê me, bijî têkoşîna Wanê.
Tişta ku diviya bibe, bû û îradeya gelê Wanê bi ser ket.
Li ser xêrê be.”
Bijî gele me, bijî tekoşîna Wane…
— Tuncer BAKIRHAN (@tuncerbakirhan) April 3, 2024
Olması gereken oldu ve Van halkının iradesi hayat buldu.
Hayırlı olsun pic.twitter.com/2EtXg7iKfD
Daxuyaniya DEM Partiyê
Têkildarî biryarê DEM Partiyê li ser hesabê xwe yê Xê daxuyaniyek da û got:
“Di encama berxwedana gelê Kurd, dostên me û raya giştî ya demokratîk de biryar hat dayîn ku mazbata li Hevserokê Şaredariya Bajarê Mezin a Wanê Abdullah Zeydan were vegerand.
Her Bijî Berxwedana Gelê Kurd!”
Kürt halkının, dostlarımızın ve demokratik kamuoyunun direnişi sonucunda Van Büyükşehir Belediyesi Eş Başkanımız Abdullah Zeydan’a mazbatasının verilmesine karar verilmiştir. Her Bijî Berxwedana Gelê Kurd! pic.twitter.com/EoZTIjrtCD
— DEM Parti (@DEMGenelMerkezi) April 3, 2024
Herwiha Leyla Zanayê jî li ser hesabê xwe yê Xê anî ziman, “Wan taca serê Kurdistanê ye. Her bijî.”
Wan taca serê Kurdistane.Her bijî…
— Leyla Zana (@leylazanainfo) April 3, 2024
Çi bûbû?
31ê Adarê li Tirkiye û Bakurê Kurdistanê hilbijartinên xwecihî hatin kirin.
Namzedê DEM Partiyê Abdullah Zeydan bi rêjeya ji sedî 55,48an bû serokê Şaredariya Bajarê Mezin a Wanê û DEM Partiyê her 14 şaredariyên Wanê standin.
Abdullah Zeydan dema ku parlamenterê HDPyê bû, sala 2016an hatibû girtin û bi Selahattîn Demîrtaş re zêdetirî 6 salan di Girtîgeha Edîrneyê de mabû.
Zeydan sala 2022yan hatibû berdanû piştî ku ji girtîgehê derketibû bi biryara dadgehê qedexeya li ser mafên xwe rakiribû û li ber namzedbûna wî ti asteng nemabûn.
Derket holê ku Wezareta Dadê ya Tirkiyeyê beriya hilbijartinan bi du rojan (29ê Adarê) îtirazî dadgehê kiriye û heman dadgehê jî ev biryara xwe betal kiriye.
Namzedê AK Partiyê Abdulahat Arvas jî li Wanê bi rêjeya ji sedî 27,15an bûbû duyem.
Lê Lijneya Hilbijartinan a Bajêr mazbataya şaredarbûnê da namzedê AK Partiyê.