ENKS û PYD li navendeke Amerîkî civînên xwe pêk tînin
Hewlêr (Rûdaw) - Piştî gelek nakokî û nexweşiyan, hevdîtinên rasterast di navbera Encumena Niştîmanî ya Kurd li Sûriyê (ENKS) û Partiya Yekîtiya Demokratîk (PYD) de li navendeke leşkerî li Hesekê destpê kirin.
Heta niha PYDê û ENKSê 4 caran civiyane û di wan civînan de li ser çend xalan li hev kirine. Di derbarê wan hevdîtinan de Medyaya Amerîka dinivisîne, ku ji destpêka nîsanê û heta niha, ENKSê û PYDê bi amadebûna Nûnerê Amerîka li Rojavayê Kurdistanê û bakurê Sûriyê William Roebuck û fermandarê HSDê Mazlûm Kobanî li navendeke Amerîkî li başûrê Hesekê 4 caran bi awayekî rasterast civiyane û encamên civînan jî gelekî baş bûne.
Xalên sereke ku ENKSê û PYDê li ser li hev kirine, wiha ne: Sûriyê welatekî îtîhadî, demokrat û hemreng be, rêjîma niha rêjîmeke stemkar e û tûndûtîjiyê bikar tîne. Herweha lihev kirin, ku navçeyê Kurdî ji aliyê siyasî û cografî ve yekgirtî bin.
Li gor medyaya Amerîkî, di civînê de herdu aliyan tekez kirine, ku divê pêwendiyên erênî ligel welatên cîran hebin û krîza Sûriyê li gor biryara 22.54 were çareserkirin.
Mafê Kurdan jî yên neteweyî, çandî û siyasî di çarçoveya destûrê de were naskirin û koçber jî vegerin malên xwe.
Ev danûstandin bi navbeynkariya Amerîka û piştgîriya Başûrê Kurdistanê têne kirin û 25ê meha borî jî Mazlûm Kobanî di konferanseke rojnamevanî de ragihandibû, dibe ku di demeke nêzîk de mizgîniyeke baş bidin Kurdên Rojavayê Kurdistanê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse