Hewlêr (Rûdaw) – Du welatiyên din ên ên Rojhilatê Kurdistanê ku di xwepêşandanên bajarê Bokanê yê parêzgeha Urmiyê de bi guleyên hêzên emnî yên Îranê birîndar bûbûn, li nexweşxaneyê canê xwe ji dest dan.
Navê yek ji wan kesan Awat Qadirpûr û yê din Îbrahîm Şerîfî ye.
Li gor zanyariyan, Awat Qadirpûr roja 18 Mijdara 2022an li xaleke pişkinînê li nêzî bajarê Bokanê ji aliyê hêzên Supaya Pasdaran ve hatibû gulebarankirin û bi giranî birîndar bibû.
Rêxistina Mafên Mirovan a Hengawê ragihandiye, Awat Qadirpûr roja Çarşembê 30ê Mijdara 2022an piştî 12 rojan ji ber giraniya birînên xwe li nexweşxaneyeke bajarê Urmiyê canê xwe ji dest daye.
Her li gor Hengawê, Îbrahîm Şerîfî yê 29 salî jî roja Sêşemê 29ê Mijdarê ji ber giraniya birînan li Nexweşxaneya Seyiduşuheda ya Urmiyê canê xwe ji dest daye.
Li gor zanyariyan, Îbrahîm Şerîfî roja 17ê Mijdarê di xwepêşandekê de li bajarê Bokanê hatibû birîndarkirin.
Li gor rêxistinên mafên mirovan ên Rojhilatê Kurdistanê, ji destpêka xwepêşandanên li Îran û Rojhilatê Kurdistanê ve ku piştî bûyera canjidestdana keça Kurd a Seqizî Jîna (Mehsa) Emînî di 17ê Îlona 2022an de hatin destpêkirin, 120 kesan li Rojhilatê Kurdistanê canê xwe ji dest dane ku 13 ji wan zarok in.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse