Li Sineyê dest danîn ser 3 kîlo û 300 gram madeyên hişbir

Hewlêr (Rûdaw) - Birêvebirê Polîsê navçeya Qurweyê yê parêzgeha Sineyê ya Rojhilatê Kurdistanê ragihand ku wan dest daniye ser zêdetirî 3 kîlogram madeyên hişbir û tohmetbarek jî desteser kiriye.

Birêvebirê Polîsê Qurweyê Vahîd Muzeferî ji medyaya Îranê re ragihand ku hêzên wan kesek desteser kiriye ku li bajêr di peydakirin û belavkirina madeyên hişbir de dixebitiye.

Vahîd Muzeferî da zanîn ku wan di operasyonê de dest daniye ser 3 kîlo û 300 gram madeyên hişbir.

Her wiha ji bo tohmetbarê desteserkirî dosyeya lêkolînê hatiye vekirin.

Li gorî amarên fermî yên parêzgeha Sineyê, par dest danîn ser hezar û 300 kîlogram madeyên hişbir.

Li parêzgehê rêjeya herî zêde ya bikaranîna madeyên hişbir bi rêjeya ji sedî 35an tiryak û berhemên wê ne.

Li pey wê jî madeyên din bi van rêjeyan tên bikaranîn:

·         Krîstal: Ji sedî 24

·         Eroîn: Ji sedî 21

·         Heşîş: Ji sedî 12

·         Madeyên din ên hişbir: Ji sedî 8

Navçeyên parêzgehê yên ku li gorî rêzê herî zêde madeyên hişbir lê tên bikaranîn ev in: Sine, Qurwe, Seqiz, Dêwlan û Kamyaran.