Hewlêr (Rûdaw) - Paytexta rewşenbîriyê Başûrê Kurdistanê, mazûvaniya stêrkê geş ê Sûriyeyî û cîhana Erebî Eymen Zêdan kir.
Lîstikvan û hunermend Eymen Zêdan ku xwediyê projeyeke rewşenbîriyê ya taybet e, ji aliyê pêşkêşkar Şahî Ebdullahê ve bi germî hat pêşwazîkirin.
Serdana wî ya yekem a Silêmaniyê nebû, wî sala 2019an beşdarî Festîvala Fîlman a Silêmaniyê bûbû.
Zêdan li ser hestê xwe yê ji bo Silêmaniyê got:
“Hinek bajar hene di dîtina yekem de tu evîndarê wan dibî.”
Eymen Zêdan her wiha amaje pê kir, Kurd rêzeke mezin li huner û hunermandan digirin, vê jî hesteke mezin a spasdariyê li cem wî çêkiriye.
Gera Zêdan serdaneke asayî nebû, derfetek bû ji bo ku ji nêzîk ve çanda Kurdî nas bike.
Bi rewşenbîr û hunermenda Kurd Fatin Ehmedê re çû serdana Çayxaneya Şebî ku cihekî taybet e ji bo ronakbîr û hunermandan.
Her wiha çû serdana Muzexaneya Silêmaniyê û bi birêvebirê wê, Haşim Heme Ebdullah re gotûbêja li ser dîroka damezrandina muzexaneyê û beşên wê kir.
Zêdan derbarê bandora şer a li ser jiyana hunerî ya xwe anî ziman:
“Şer birîneke kûr di hundirê her kesî de hiştiye.”
Zêdan di dema şer de çar komele çîrok nivîsandine û wekî derhêner û lîstikvan beşdarî çend rezêfîlman bûye.
Eymen Zêdan da zanîn, erkê hunermandan e ku wan bûyerên ku bi ser wan de hatine tomar bikin da ku nifşên paşerojê sûdê jê wergirin.
Fatin Ehmedê amaje pê kir ku Herêma Kurdistanê ji bo guherandina paşmayên wêranî, girtîgehan û mirinê ji bo cihên tijî jiyan hemû şiyana xwe bi kar tîne.
Zêdan bi wê ramanê re hevfikr bû û diyar kir ku pêxistina mûmên şadiyê û avakirina avahiyan û qadên kesk, herî kêm ruhê wan kesên ku canê xwe gorî rêya axa xwe kirine rehet dike.
Zêdan tekezî li ser wê yekê kir ku avakirina nû bi tenê bi wateya avakirina kevir nîne, pêwîst e mirov jî dubare were avakirin.
“Ken êdî ne karekî hêsan e”
Eymen Zêdan her wiha got, li ser nifşên dema şer bandoreke xirab a pergala exlaqî û zanînê çêbûye, ji ber vê yekê erkê hemûyan e ku qala avakirina mirovahiyê bikin.
Zêdan li ser kenînê û girîngiya wê ya di vê serdemê de anî ziman:
“Ken êdî ne karekî hêsan e lê hunermend hest dike berpirsyar e ku kenê bixe ser lêvên xelkê.”
Eymen Zêdan da zanîn ku tişta herî zehmet di pîşeya wan de ew e ku carinan neçar dibin rewşa taybet a xwe ji bîr bikin û bikevin ber berpirsyariyeke nû.
Zêdan li ser şano û girîngiya wê jî destnîşan kir, eger hunermend ji şanoyê re dilsoz nebe, ew dê beşeke mezin ji lihevhatina mirovî û zanînê ya xwe ji dest bide.
Şano, di mêjiyê wî de wekî hunereke gelêrî maye, ji ber ku hemû wan şûnwarên ji şanoyê mayî, pêlikên wan bi awayekî ne ku cihê bi deh hezaran kesan tê de dibe.
Di dawiya geşta xwe de Zêdan serdana Çemê Rêzanê kir ku cihekî geştyariyê yê balkêş e.
