Hewlêr (Rûdaw) - Selîm Berekat helbestvan û nivîskarekî Kurd e ku bi zimanê erebî dinivîse. Di nava 40 salên borî de, Selîm Berekat bi roman û dîwanên xwe cîhana edebiyata erebî mitûmat kir.
Berhema nû ya Selîm Berekat bi navê "Dîwan 2", berî demekê ji aliyê Weşanxaneya el Meda ve hat çap û belavkirin. Beşê duyem yê dîwana Selîm Berekat ji 1058 rûpelan pêk tê û 9 berhemên helbestan vedihewîne ku di navbera salên 2008 û heta 2017an wek pirtûkên cuda derketibûn.
"Dîwan Dido" van pirtûkan li xwe digre: Gelê Sisêyê Berbangê ji Pêncşema Sêyem, Wergerandina Bazaltê, Lehî, Pozbilindiya Hevrêk, Xwedawend, Bakurê Dilan yan Rojavayê wan, Sûriyê, Xezelnameya Mezin û Hemû Derî.
Beriya 10 salan jî, ango di sala 2007an de Dezgeha Erebî ya Lêkolîn û Belavkirinê beşê yekem ê hemû helbestên Selîm Berekat belav kiribû. Di beşê yekem de, 11 dîwan cih digrin ku di navbera salên 1973an heta sala 2005an hatine nivîsandin.
Tecrûbeya Selîm a nivîsandinê, nexasim di warê helbestê de, pir cihêreng û cuda ye. Li ser bergê dîwana Selîm a nû, gotinên gelek kesayetiyên navdar ên Ereb hene ku nivîs û şêwaza Selîm ew matmayî kirine.
Helbestvanê filistînî Mehmûd Derwêş wiha li ser Selîm dibêje: "Ji destpêka salên heftêyî ve, dema Selîm Berekat qada helbesta erebî dagîr kir, mizgîniya helbesteke nû û cuda bi xwe re anî. Ev ciwanê Kurd yê şermîn bû wek bavekî ji gelek helbestvanên Ereb re. Min kedeke mezin da ji bo ez nekevim bin bandora wî de."
Dema hîn Selîm 20 salî bû, helbestvanê sûrî Adonîs jî wiha li ser wî got: "Zimanê erebî di berîka vî helbestvanê Kurd de ye!"
Gotina balkêş a helbestvanê navdar Nîzar Qebanî jî li ser bergê pirtûkê cih digre: "Ezbenî, te tiştek ji me re nehîşt, destên xwe ji ser helbestê rake!"
Helbestvan û rexnegirê libnanî Pol Şawûl jî wiha dibêje: "Selîm Berekat ji xewnbînekî mezintir e, ew xewnçêker e; ew ne tenê zimanzan e, lê ew zimançêker e jî."
.webp&w=3840&q=75)
.webp&w=3840&q=75)
