Hewlêr (Rûdaw) - Serokê Amerîkayê Donald Trump li ser çalakiyên nukleerî yên Îranê daxuyaniyên gelekî tund dan û got ku divê Rêberê Olî yê Îranê Elî Xamineyî "gelekî dilgiran be".
Donald Trump derbarê birêvebiriya Îranê û bernameya wê ya nukleerî de gefên nû û tûj xwarin.
Trump diyar kir ku wî bihîstiye Îran dixwaze bernameya xwe ya nukleerî zindî bike û hişyarî da Tehranê.
"Em dê wan bişînin cihê ku heq dikin"
Trump bertekeke tund nîşanî gavên nukleerî yên Îranê da û got:
"Li gorî ku min bihîstiye, ew dixwazin careke din dest bi bernameya nukleerî bikin.
Eger vê yekê bikin, em dê wan bişînin wî cihê ku heq dikin."
Trump rasterast bangî Elî Xamineyî kir û got, "Divê ew niha gelekî dilgiran be."
"Nekarîn nêzîkî cihên lêdayî bibin"
Trump li ser wan cihên ku Amerîkayê berê li wan xistibû jî axivî û îdia kir ku Îranê xwestiye vegere tesîsên bombebarankirî lê bi ser neket.
Trump got, "Ew nekarîn nêzîkî wan deveran jî bibin, ji ber ku ew der bi temamî wêran bûbûn."
Hişyariya tesîsên nû: "Dê tiştên xerab bên serê we"
Serokê Amerîkayê anî ziman ku agahiya wan ji planên Îranê yên avakirina tesîsên nû yên nukleerî heye û tekez kir ku ew rewşê ji nêzîk ve dişopînin.
Trump hişyarî da û got, "Em pê hesiyan. Min jî got; eger hûn vê yekê bikin, em dê tiştên gelekî xerab bînin serê we."
