Hewlêr (Rûdaw) - Piştî hilbijartinên giştî yên Swêdê, Serokê Parlamentoyê Andreas Norlen erkê avakirina hikûmeta nû da Seroka Partiya Sosyal Demokrat Magdalena Anderssonê.
Ji bo ku Magdalena Andersson bi partiyên bloka çep re li ser dabeşkirina wezaretan li hev bike û hikûmetê ava bike, heta 28ê Îlonê dema wê heye.
Li Swêdê piştî hilbijartinên giştî yên 13ê Îlonê, liv û tevgera siyasî ya ji bo avakirina hikûmetê bi awayekî fermî dest pê kir.
Serokê Parlamentoya Swêdê (Riksdag) Andreas Norlen, seroka partiya sereke ya mixalefetê Magdalena Andersson ji bo pêkanîna kabîneya nû erkdar kir.
Magdalena Anderssona 59 salî ku di navbera salên 2021-2022yan de wekî serokwezîra yekem a jin a di dîroka Swêdê de xebitîbû dê ji bo ku partiyên çepgir ên xwedî nêrînên cuda bîne ser xaleke hevpar li ser maseya dan û standinan rûne.
Andersson: Em dê gavên avaker biavêjin
Magdalena Anderssonê piştî erkdarkirina xwe li ser hesabê xwe yê tora civakî daxuyaniyek da û peyama lihevkirin û diyalogeke avaker da û got:
“Ev erkek e ku min bi hestekî mezin ê xwenizmî û berpirsyariyê girtiye ser milê xwe.
Ji bo avakirina birêvebiriya nû em dê gavên avaker biavêjin.
Ez bi biryar im ku pêşengiya hikûmetekê bikim ku daxwaza gelê Swêdê ya li ser sindoqan pêk bîne, welatê me bi pêş bixe û yekîtiya me ya civakî biparêze.”
Li gorî encamên hilbijartinê bloka çep a ji çar partiyan ku ji Partiya Sosyal Demokrat, Partiya Çep, Partiya Navendê û Partiya Keskan pêk tê, tenê bi ferqa 3 kursiyan piraniya parlamentoya ji 349 kursiyan bi dest xist.
Vê blokê li hemberî hevpeymaniya rastgir a bi serokatiya Serokwezîr Ulf Kristersson bi serkeftineke hesas piraniya kursiyan misoger kir.
