Hewlêr (Rûdaw) - Serokwezîrê Swêdê Ulf Kristersson eşkere kir ku wî dest ji kar berdaye.
Ev biryar piştî wê yekê hat ku bloka rastgir di hilbijartinên giştî yên Swêdê yê 13ê Îlonê de piranî ji dest da.
Ulf Kristersson di daxuyaniya xwe de da zanîn ku ew dê ji serokwezîriyê vekişe û bi vê yekê re rê li ber avakirina hikûmeta nû vebû.
Partiya Moderaternaya bi serokatiya Kristersson di hilbijartinan de 70 kursî bi dest xistin.
Bloka hikûmetê bi hevparên xwe yên din re bi giştî 173 kursî standin.
Bloka mixalefetê piranî bi dest xist
Li gorî encamên Saziya Hilbijartinan a Swêdê û kanala SVTyê, bloka mixalefetê ya çepgir a navendî 176 kursî bi dest xistine.
Bi vî awayî bloka bi serokatiya Magdalena Anderssonê di parlamentoya 349 kursiyî de piranî bi dest xist.
Bloka mixalefetê ji Sosyal Demokratan, Partiya Çep, Keskan û Partiya Navendê pêk tê.
Piştî van encaman tê çaverêkirin ku Seroka Partiya Sosyal Demokrat û serokwezîra berê Magdalena Andersson ji bo avakirina hikûmetê dest bi hewldanan bike lê belê li Swêdê xelk rasterast serokwezîr hildinabijêre.
Ji bo diyarkirina serokwezîrê nû divê pêvajoya avakirina hikûmetê temam bibe ku Serokê Parlamentoyê wê bi rê ve dibe.
Civîna yekem a parlamentoya nû (Riksdag) dê 28ê Îlonê were kirin.
Îstifaya Kristersson tê wê wateyê ku hikûmeta rastgir a navendî bi dawî bûye.
Hikûmeta rastgir 4 salan li Swêdê desthilat bû.
Tê çaverêkirin ku heta hikûmeta nû were avakirin hikûmeta niha karê xwe bidomîne.
