Hewlêr (Rûdaw) - Rayedaran ragihand ku piştî êrişên Rûsyayê yên bi dron, mûşekên krûz û mûşekên balîstîk ên li seranserê Ukraynayê, li Kîeva paytext herî kêm 6 kes birîndar bûne.
Di van êrişan de bajar û binesaziyên krîtîk bûne armanc.
Hêzên Asmanî yên Ukraynayê bi şev hişyariyên lezgîn dan çimkî pêlên dron û mûşekên balîstîk ên bilez êrişî bajêr kir.
Rayedarên parastina asmanî gelek caran ji xelkê xwest ku demildest xwe bispêrin stargehan.
Saziya Rewşên Bilez a Dewletê ragihand ku hêzên Rûsyayê bi dronan êrişî navçeyên Borispil û Fastivê yên Kîevê kiriye.
Di encama êrişan de li herêma Borispilê agir bi kargehên pîşesaziyê ketiye û 7 barhilgir şewitîne.
Tîmên rizgarkirinê her wiha çûn hawara navendeke lojîstîk ku du caran rastî êrişê hatibû û hemû agirên li wê derê vemirandin.
Li Kîevê şewat derket
Serokê Şaredariya Kîevê Vitali Klitschko piştrast kir ku paytext rastî êrişeke balîstîk hatiye. Wî xwest ku tîmên tenduristiyê bişînin navçeya Solomyanskyiyê ya bajêr.
Klitschko da zanîn ku li hewşa saziyeke perwerdeyê ya li navçeya Holosiyivskyiyê şewat derketiye.
Wî her wiha piştrast kir ku li deverên ne niştecihbûnê yên navçeyên Podilskyî û Darnytskyiyê jî şewat derketiye.
Klitschko piştrast kir ku di encama êrişên li ser bajêr de herî kêm 6 kes birîndar bûne.
Sê ji birîndaran rakirine nexweşxaneyê û sêyên din jî li ser piyan hatine dermankirin.
Saziya Rewşên Bilez a Ukraynayê ragihand ku xebatkarên wan 13 welatiyên din ên ku li seranserê bajêr asê mabûn rizgar kirine.
Li navçeya Holosiyivskyiyê, pêla teqînê li qata 23yan a avahiyeke 26 qatî ya ne niştecihbûnê xist.
Tîmên rizgarkirinê 2 kesên ku di avahiyeke 16 qatî de asê mabûn û kesekî din ê ku li nêzîkî garajeke ku dişewitî rizgar kirin.
Li navçeya Solomyanskyiyê jî tîman 10 kesên ku di avahiyeke 5 qatî de asê mabûn rizgar kirin.
Tîmên agirvemirandinê agirê li embar, garajên taybet û wesayitên li navçeyên Podilskyî, Darnytskyi û Dniprovskyiyê vemirandin.
Êriş li gelek bajaran hebûn
Êriş tenê li paytextê neman û li herêmên girîng ên wekî Dnipropetrovsk, Poltava, Çernihiv, Mikolayîv, Çerkasi, Sumi, Zaporijya, Odesa, Xarkîv û Donetskê jî belav bûn.
Balafirên şer ên Rûsyayê her wiha bombeyên asmanî yên arastekirî yên bi navê “KAB” bi kar anîn.
Bi van bombeyên wêranker êrişî çeperên eniyên pêş û avahiyên sivîlan ên li herêmên rojhilat kirin.
Ev êriş nîşan didin ku şer berdewam dike. Piştî agirbesta demkî ya 3 rojî ya di dema serdana nûnerên Amerîkayê Steve Witkoff û Jared Kushner de, êrişan ji nû ve dest pê kir.
