Hewlêr (Rûdaw) - Serokkomarê Fransayê Emmanuel Macron ragihand ku welatê wî dê mûşekên nû yên parastina asmanî bide Ukraynayê.
Ev biryar di demekê de hat dayîn ku ji ber êrişên dawî yên Rûsyayê, pergalên parastina asmanî yên Kîevê rûbirûyî kêmasiya cebilxaneyê bûne.
Emmanuel Macron derbarê mijarê li ser hesabê xwe yê Xê daxuyaniyek belav kir û got:
"Gelekî girîng e ku hemû amûrên pêwîst ên ji bo parastina asmanî û rûbirûbûna êrişan ji bo Ukraynayê werin dabînkirin."
Serokkomarê Fransayê da zanîn ku wî bi rêya pêwendiyeke telefonî, Serokê Ukraynayê Volodymyr Zelensky ji xurttirina piştgiriya welatê xwe û radestkirina mûşekên parastinê agahdar kiriye.
Ukrayna dê dest bi hilberîna mûşekan bike
Her wiha Zelensky li ser tora civakî ya Xê ragihand ku wî û Macron qala hemû mijarên sereke kiriye.
Li gorî gotina Zelensky, di serî de wan qala pêdiviya welatê wî ya bi parastina asmanî kiriye û got:
"Em li ser lezkirina pêvajoya radestkirina kel û pelên herî nû û mûşekên Fransayî li hev gihîştin."
Serokê Ukraynayê her wiha ji bo ducarekirina amadehiya Fransayê ku destûra fermî bide Ukraynayê da ku di navxweya welatê xwe de dest bi hilberîna mûşekan bike spasiya Macron kir.
Civîna 'Hevpeymaniya Dilxwazan' li Kîevê
Ev guftûgoyên dîplomatîk berî civîna roja duşemê ya "Hevpeymaniya Dilxwazan" tên kirin.
Ev hevpeymanî destpêşxeriyeke hevpar a Fransa û Brîtanyayê ye da ku zextê li ser Moskowê bikin ku şer rawestîne.
Li gorî daxuyaniya Koşka Elyseeyê, ev civîn dê roja duşemê ku di heman demê de roja serxwebûna Ukraynayê ye, bê lidarxistin.
Civîn dê bi serokatiya hevpar a Emmanuel Macron (bi rêya vîdeo konferansê), Serokwezîrê Almanyayê Friedrich Merz û Serokwezîrê nû yê Brîtanyayê Andy Burnham bê kirin.
Berpirsekî Yekîtiya Ewropayê jî eşkere kir ku nêzîkî deh serkirdeyên cîhanê, di nav wan de Serokê Konseya Ewropayê Antonio Costa jî heye, ji bo beşdarbûna di vê civînê de dê bigihîjin Kîevê.
