Hewlêr (Rûdaw) - Nûnerê Taybet ê Amerîkayê yê Kar û Barên Sûriye û Îraqê Tom Barrack êrişa li ser ofîsa Mesrûr Barzanî ya li Hewlêrê bi tundî şermezar kir.
Tom Barrack li ser êrişê got, "Ev destdirêjiya li ser hevpeymanên me yên Kurd ên pêbawer nayê qebûlkirin."
"Gefeke rasterast e"
Nûnerê Taybet ê Serokê Amerîkayê yê Kar û Barên Sûriye û Îraqê destnîşan kir ku ev êriş ji bo aramiya herêmê xeter e.
Barrack anî zimên, "Ev destdirêjî ji bo aramiya herêmê gefeke rasterast e."
"Em dê bêdeng nemînin"
Tom Barrack tekez kir ku ew dê li hemberî van kiryarên dijminane çavên xwe negirin û got:
"Em dê bi ti awayî çavên xwe ji van dijminatiyan re negirin û em dê li hemberî wan bêdeng nemînin."
Piştgiriya ji bo Îraqê
Her wiha Nûnerê Taybet ê Serokê Amerîkayê piştgiriya xwe ya temam ji bo Serokwezîrê Îraqê Elî Zeydî ducare kir.
Barrack da zanîn ku ew ji bo "vegerandina serweriya temam a welêt" piştgiriyê didin Elî Zeydî.
Tom Barrack di dawiyê de destnîşan kir ku divê hemû çek û hêzên ewlehiyê tenê di bin desthilat û sîwana dewleta Îraqê de bin.
Çi bûbû?
Dijîterora Kurdistanê ragihand ku 2 dronên bombebarkirî avêtine Ofîsa Taybet a Serokwezîr û cihê mayînê yê Berpirsê Ajansa Parastinê.
Li gorî daxuyaniya Dijîterora Kurdistanê, îro (17ê Tebaxa 2026an) demjimêr 00:28an, 2 dronên bombebarkirî yên "Hedîd-110" ji aliyê sînorê Îranê ve hatine avêtin.
Dijîterorê da zanîn ku dron berdane baregeha Ofîsa Taybet a Serokwezîrê Herêma Kurdistanê û cihê mayînê yê Berpirsê Ajansa Parastinê yên li navçeya Pîrmamê ya Hewlêrê.
Her wiha hat diyarkirin ku di êrişê de zererên canî çênebûne.
Dijîterorê di daxuyaniya xwe de ev êriş şermezar kirin û got:
"Em van êriş û destdirêjiyan bi tundî şermezar dikin û bi ti awayî nayên qebûlkirin, hemû berpirsyariya encaman jî di stûyê encamderan de ye."
Hedîd-110
Hedîd-110 drona Îranê ya herî bilez e, leza wê di demjimêrekê de digihîje 510 kîlometreyan û motora wê ji cureyê turboyê ye.
Ev dron dikare heta 9 kîlometreyan bilind bibe û demjimêrekê bifire û 350 kîlometreyan dûr here.
Her wiha, dikare 30 kîlogram teqemenî hilgire.
Dron ji bo wê hatiye çêkirin ku beriya pergalên parastina asmanî wê bibînin, bi lez û bez asmanê aliyê beramber derbas bike.
Ev cureyê dronê ji bo armanckirina radar, pêgehên hestyar, navendên fermandariyê û binesaziyên girîng hatiye çêkirin.
Cara yekem di Adara 2026an de di şerê li dijî Îsraîl û Amerîkayê de ji aliyê Supaya Pasdaran a Îranê ve hat bikaranîn.
Îranê bi awayekî fermî nirxê wê eşkere nekiriye lê tê texmînkirin ku nirxê wê di navbera 20 hezar û 50 hezar dolarî de ye.
