Hewlêr (Rûdaw) - Raporeke nû ya rojnameya New York Timesê, krîza sîxuriyê ya di navbera Amerîka û Îsraîlê de derxist holê.
Li gorî raporê, Îsraîlê rayedarên payebilind ên Amerîkayê yên ku bi Îranê re dan û standinan dikin dişopîne.
Li ser vê yekê Pentagonê hişyariya sîxuriyê derxist asta herî jor.
Şerê îstîxbaratê yê di navbera Amerîka û Îsraîlê de derbasî qonaxeke nû bûye.
Li gorî raporên îstîxbarata Amerîkayê yên ku ketine destê New York Timesê, xebatên sîxuriyê yên Îsraîlê yên li Washingtonê êdî wekî metirsiya "welatên dijmin" tên dîtin.
Tîma nêzîk a Trump di hedefê de ye
Li gorî raporê, îstîxbarata Îsraîlê bi taybetî kesên ji bo peymaneke nû ya aştiyê ya bi Îranê re dixebitin xistine bin şopandina nêzîk.
Di van xebatên ku tîma nêzîk a Trump kirine hedef de navên girîng hene.
Nûnerê Taybet ê Trump Steve Witkoff, Rayedarê Stratejiyê yê Payebilind ê Pentagonê Elbridge Colby û Berpirsê Siyasetên Rojhilata Navîn ê Pentagonê Michael DiMino di rêza yekem a hedefan de ne.
"Xeta sor hat derbaskirin"
Her çend şopandina Amerîka û Îsraîlê ya hevdû ne rewşeke nû be jî pêngavên dawî li Washingtonê bûne sedema nerehetiyeke mezin.
Rayedarên Amerîkayê diyar dikin ku hewldana Îsraîlê ya ji bo zanîna hûrgiliyên hesas ên dan û standinan "xeta sor derbas kiriye".
Raporeke Saziya Îstîxbarata Parastinê nîşan da ku bernameyên sîxuriyê bi dizî li telefonên xebatkarên Amerîkî yên li Îsraîlê hatine barkirin.
Li ser vê rûdanê Amerîkayê rîska sîxuriyê ya ji aliyê Îsraîlê ve, ji kategoriya "zêde" derxist asta "gelekî xeternak".
Amûra guhdarîkirinê li baregehê
Îdiayên din ên balkêş ên di raporê de jî mezinahiya sîxuriyê îsbat dikin.
Sala 2021ê: Hat tesbîtkirin ku efserên îstîxbarata leşkerî yên Îsraîlê hewl daye amûrên guhdarîkirinê li baregeha Saziya Îstîxbarata Parastinê ya Amerîkayê (DIA) bi cih bikin.
Sala 2023yan: Hat îdiakirin ku ajanên Şabakê yên servîsa îstîxbarata navxweyî ya Îsraîlê, hewl daye amûra guhdarîkirinê di wesayîteke "Secret Service"ê de bi cih bikin ku erka wê parastina Serokê Amerîkayê ye.
Cudahiyên stratejiyê
Sedema serekî ya şerê îstîxbaratê, cudahiya kûr a siyaseta her du welatan a li ser Îranê ye.
Amerîka dixwaze bi fişara leşkerî Îranê bîne ser maseyê û peymanekê îmze bike.
Lê aliyê Îsraîlê dixwaze ku êriş heta rûxîna desthilata niha ya Tehranê dewam bikin.
Tê nirxandin ku Îsraîl dixwaze gavên îdareya Trump ji berê ve hîn bibe û van planan manîpule bike.
Xemsariya rayedaran karê Îsraîlê hêsan dike
Rayedarekî berê ji New York Timesê re axivî û got ku di serkeftina xebatên sîxuriyê de para xemsariya ewlehiyê ya rayedarên Amerîkî jî heye.
Rayedarên îdareya Trump li şûna kanalên fermî telefonên xwe yên şexsî bi kar tînin.
Ew protokolên ewlehiyê yên balyozxaneyan red dikin û bi balafirên taybet seferê dikin.
Ev rewş wan ji bo servîsên îstîxbarata biyanî dike hedefên hêsan.
Qesra Spî û Balyozxaneya Îsraîlê ya li Washingtonê bi awayî fermî îdiayan red dikin.
Lê yekîneyên îstîxbaratê yên Amerîkayê li hemberî vê metirsiya nedîtî ya hevpeymanên xwe hêlên xwe yên parastinê xurt dikin.
