Hewlêr (Rûdaw) - Serokwezîrê Herêma Kurdistanê Mesrûr Barzanî li Qahîreyê bi Serokkomarê Misirê Ebdulfettah Sîsî re civiya û tekezî li ser bipêşxistina pêwendiyan di warên veberhênan û bazirganiyê de hat kirin.
Serokwezîrê Herêma Kurdistanê her wiha piştî hevdîtina bi Sîsî re Keleha Selahedînê Kurdî (Eyûbî) jî kir.
Serokwezîrê Herêma Kurdistanê Mesrûr Barzanî doh bi serdaneke fermî çûbû Misirê.
Hikûmeta Herêma Kurdistanê di daxuyaniyekê de ragihand ku Serokkomarê Misirê Ebdulfettah Sîsî li Koşka Komariyê ya li Qahîreyê pêşwaziya Mesrûr Barzanî kir.
Di civînê de Serokkomarê Misirê kêfxweşiya xwe ji bo serdanê nîşan da û amadebûna welatê xwe ya ji bo bipêşxistina pêwendiyên dualî derbirî.
Mesrûr Barzanî û Ebdulfettah Sîsî behsa "girîngiya xurtkirina pêwendiyên Herêma Kurdistan û Misirê yên di warên curbicur de, bi taybetî di warê veberhênan û dan û standina bazirganiyê de" kir.
Serokwezîrê Herêma Kurdistanê Mesrûr Barzanî ji bo çespandina aştî û aramiya herêmê pesnê rola Misirê û Sîsî da.
Ziyareta Keleha Selahedîn
Her di çarçoveya ziyareta xwe ya Misirê de, Mesrûr Barzanî kela dîrokî ya Selahedînê Eyûbî ya li bajarê Qahîreyê ziyaret kir û li beşên wê kelê geriya.
Keleha Selahedîn yek ji şûnwarên herî giring ên dîrokî yên cîhanê û Qahîreyê ye ku ji aliyê fermandarê mezin ê Kurd Selahedînê Eyûbî ve wekî keleheke leşkerî ji bo parastina bajêr hatiye avakirin.
