Hewlêr (Rûdaw) - Nûnerê Taybet ê Amerîkayê yê Kar û Barên Sûriyeyê Thomas Barrack, nexşerêya nû ya ji bo Sûriye û HSDyê eşkere kir û ragihand ku ew dê HSDyê di nav saziyên Sûriyeya nû de entegre bikin.
Thomas Barrack piştî serdana Serokkomarê Demkî yê Sûriyeyê Ehmed Şer a Koşka Spî, li ser nexşerêya nû ya ji bo Sûriye û HSDyê peyamek belav kir.
Tom Barrack serdana Ehmed Şer wekî "xaleke werçerxanê ya diyarker" ji bo Rojhilata Navîn û Sûriyeyê bi nav kir û diyar kir ku ev serdan di navbera Sûriye û Amerîkayê de gava destpêkirina hevparîyeke nû ye.
Barrack got, “Êdî dema wê hatiye ku em dev ji biyanîbûnê berdin û berê xwe bidin têkilîbûnê û derfeteke rasteqîn a nûbûnê bidin Sûriye û xelkê wê.”
“Şam dê di şerê li dijî terorê de bibe hevpar”
Bi gotina Tom Barrack, Ehmed Şer li Koşka Spî pêbendbûna xwe ya bi tevlîbûna Koalîsyona li dijî DAIŞê nîşan daye.
Wî got, bi vê yekê Sûriye ji "çavkaniya terorê" vediguhere "hevparê têkoşîna li dijî terorê" û Şam dê di rûbirûbûn û têkbirina şaneyên DAIŞê, Supaya Pasdaran a Îranê, Hemas, Hizbulah û “torên din ên terorîst” de bi awayekî çalak alîkariya Amerîkayê bike.
Li ser entegrasyona HSDyê lihevkirin çêbû
Barrack her wiha eşkere kir ku piştî civîna sereke, civîneke sêalî ya krîtîk di navbera Wezîrê Karên Derve yê Amerîkayê Marco Rubio, Wezîrê Karên Derve yê Tirkiyeyê Hakan Fîdan û Wezîrê Karên Derve yê Sûriyeyê Eshed Şeybanî de hatiye lidarxistin û di wê civînê de nexşerêya qonaxa bê ya çarçoveya Amerîka-Tirkiye-Sûriyeyê hatiye xêzkirin.
Li gorî wê nexşerêyê, dê HSD di nav saziyên aborî, parastin û sivîl ên Sûriyeya nû de bên entegrekirin.
Peywendiyên Tirkiye-Sûriye-Îsraîlê
Tom Barrack da zanîn ku di qonaxa bê de, dê pêwendiyên Tirkiye-Sûriye-Îsraîlê jî ji nû ve bên pênasekirin û li ser pirsgirêkên sînorê Libnanê jî dê gav bên avêtin.
Wî rola Tirkiyeyê ya di vê pêvajoyê de bilind nirxand û tifaqa berfireh a Tirkiye, Qeter û Erebistana Siûdî ya ji bo vejandina Sûriyeyê wekî "bandoreke efsûnî" bi nav kir.
Barrack di dawiyê peyama xwe de ji Kongreya Amerîkayê xwest ku ji bo rakirina Cezayên Sezarê pêngaveke dîrokî biavêje da ku "hikûmeta nû ya Sûriyeyê karibe motora xwe ya aboriyê ji nû ve bixebitîne."
Statement by Ambassador Thomas J. Barrack, Jr.
— Ambassador Tom Barrack (@USAMBTurkiye) November 13, 2025
On the Historic Visit of Syrian President Ahmed al-Sharaa to the White House
This week marks a decisive turning point in the modern history of the Middle East - and in the remarkable transformation of Syria from isolation to…
