Hewlêr (Rûdaw) - Li Tengava Hurmizê û herêma Kendavê aloziya leşkerî ya di navbera Amerîka û Îranê de gihîşt asteke bilind.
Artêşa Amerîkayê êrişî Girava Qeşmê ya Îranê kir. Tehranê ragihand ku wan droneke Amerîkayê xistiye xwarê.
Amerîkayê êrişî Girava Qeşmê kir
Li gorî daxuyaniyên rayedarên leşkerî yên Amerîkayê, balafirên şer ên artêşa Amerîkayê li Girava Qeşmê ya li Tengava Hurmizê navendeke avêtina mûşekan a Artêşa Pasdaran a Îranê kiriye armanc.
Berpirsekî Amerîkî ji medyayê re diyar kir ku di êrişê de "çekên hesas" hatine bikaranîn û ev operasyon wekî "parastina rewa" li hemberî tevgerên Îranê yên li dijî hêzên Amerîkayê hatiye lidarxistin.
Li aliyê din, Alîkarê Parêzgarê Hurmizganê Ehmed Nefîsî êrişa Amerîkayê ya li ser Girava Qeşmê piştrast kir lê destnîşan kir ku êrişê ti zerer negihandiye binesazî û deverên niştecihbûnê.
Îran: Me drona MQ-9 a Amerîkayê xist xwarê
Piştî êrişên li ser Girava Qeşmê, Artêşa Îranê daxuyaniyek belav kir û ragihand ku sîstemên wan ên parastina asmanî li rojhilatê Tengava Hurmizê droneke bipêşketî ya cureya MQ-9 a artêşa Amerîkayê xistiye xwarê.
Her wiha Artêşa Pasdaran a Îranê angaşt kir ku wan li başûrê Girava Qeşmê bi rêya êrişa elektronîkî dest daniye ser 2 dronên din ên çavdêriyê yên Amerîkayê.
Fermandariya Navendî ya Hêzên Amerîkayê (CENTCOM) ev angaştên Tehranê red kirin.
Li Kendavê têkbirina dronan
Aloziya li herêmê bandor li welatên din ên Kendavê jî kir.
Hêzên parastina asmanî yên Erebistana Siûdî li asmanê welatê xwe 2 dronên êrişkar beriya ku bigihîjin armancên xwe têk birin.
Piştî ku Îranê êrişî baregeheke Amerîkayê ya li Kuweytê kir, li Kuweyt û Behreynê jî zengila metirsiyê lê da û ji welatiyan hat xwestin ku xwe biparêzin.
Hewldanên dîplomatîk ên Qeter û Umanê yên ji bo kêmkirina aloziyên navbera Washington û Tehranê heta niha bêencam mane. Ev pêşhatên dawî jî tam di vê qonaxê de rû didin.

.webp&w=3840&q=75)

