Hewlêr (Rûdaw) - Rûdawê piştrast kir ku Tirkiye dê Baregeha Başîqayê qonax bi qonax radestî Îraqê bike
Li aliyê din, Ofîsa Fermandariya Giştî ya Hêzên Çekdar ên Îraqê ragihand ku Tirkiye dê dest bi gavan bike da ku Baregeha Başîqa-Zîlkanê qonax bi qonax radestî hikûmeta Îraqê bike.
Li gorî nûçeya Ajansa Nûçeyan a Fermî ya Îraqê (INA), Ofîsa Fermandariya Giştî li ser mijarê daxuyaniyek belav kir.
Di daxuyaniyê de hat diyarkirin ku Komîteya Hevbeş a Bilind a Îraq û Tirkiyeyê civiyaye.
Armanca vê civînê safîkirina dosyayên di navbera her du welatan de bû.
Hat destnîşankirin ku piştî civînê her du aliyan li ser sê xalan li hev kir.
Sê xalên peymanê
Di daxuyaniyê de hat eşkerekirin ku 23ê Îlona 2026an di navbera serokên her du welatan de peymanek çêbûye.
Li gorî xala yekem, divê li Şingalê "desthilata dewletê bi temamî were pêkanîn" û "dawî li hebûna komên çekdar bê anîn."
Tirkiye û Îraq xwedî heman îradeyê ne ku gavên hikûmeta Îraqê yên li ser vê mijarê bidomin.
Li gorî xala duyem, Tirkiye dê Baregeha Başîqa-Zîlkanê qonax bi qonax radestî hikûmeta federal a Îraqê bike. Tirkiye dê ji bo vê dest bi avêtina gavên pêwîst bike.
Li gorî xala sêyem jî biryar hat dayîn ku "Komîteya Hevahengiya Ewlehiyê ya Hevbeş" dest bi kar bike.
Armanca vê komîteyê ew e ku pêvajoya bidawîanîna hebûna komên çekdar ên li Şingalê bişopîne û çavdêriya wê bike.
Serokatiya Ragihandinê ya Serokkomariya Tirkiyeyê jî îro heman daxuyaniya hevbeş a Tirkiye û Îraqê belav kir.
Rayedarekî Îraqî ji Rûdawê re piştrast kir
Çavkaniyekî pilebilind ê hikûmeta Îraqê ev peymana valakirina baregeha Tirkiyeyê ya li Başîqayê ji Rûdawê re piştrast kir.
Li gorî peymanê, Tirkiye dê ji Başîqayê vekişe û dê li Şingalê komên çekdar nemînin.
Piştî ragihandina peymanê, Rûdawê pirsek ji rayedarekî pilebilind ê Asayîşa Niştimanî ya Îraqê kir.
Rûdawê pirsî bê ka rast e ku Tirkiyeyê biryara valakirina baregeha leşkerî ya li Başîqayê daye û soza wê yekê daye.
Çavkaniyeke pilebilind a hikûmeta Îraqê bersiv da Rûdawê û got:
"Belê rast e. Wan soza radestkirina baregehê da."
Komîteya Ewlehiyê ya Hevbeş a Bilind a Îraq û Tirkiyeyê ji bo safîkirina dosyayên navbera her du welatan civiyabû.
Di civînê de li ser sê xalên bingehîn peymanek çêbû.
Li gorî peymanê, dê Tirkiye qonax bi qonax ji baregeha leşkerî ya li Başîqayê vekişe û dê li Şingalê desthilata dewletê bê avakirin.
