Hewlêr (Rûdaw) - Amerîkayê di aloziya bi Îranê re de gaveke stratejîk avêt û keştiyên xwe yên balafiran ên li herêmê guhertin.
Keştiya USS Abraham Lincolnê cihê xwe da keştiya bi navê USS George Washingtonê.
Fermandariya Navendî ya Hêzên Amerîkayê (CENTCOM) ji bo nûkirina hêza xwe ya deryayî gava çaverêkirî avêt.
Di daxuyaniya fermî de hat ragihandin ku keştiya balafiran a ku bi hêza nukleerê dixebite USS George Washington ketiye Deryaya Umanê û dest bi erkê xwe kiriye.
Hatina keştiya nû piştî wan gotegotan pêk hat ku li ser şert û mercên jiyanê û tenduristiya derûnî ya xebatkarên keştiya USS Abraham Lincolnê derketibûn.
USS Abraham Lincoln zêdetirî 250 rojî ye li herêmê li ser kar e.
CENTCOMê îdiayên li ser torên civakî yên wekî "7 leşker di şer de mirin" û "bûyerên xwekuştinê zêde bûne" bi tundî red kirin.
CENTCOMê diyar kir ku keştiya Lincolnê di nav hêzên deryayî de xwediyê pûana herî bilind a xizmetê ye.
Bîlançoya mezin a operasyonan
Keştiya USS Abraham Lincolnê di operasyona leşkerî ya 28ê Sibatê ya li dijî Îranê de rola sereke lîstibû û bîlançoyeke mezin li pey xwe hişt.
Hat eşkerekirin ku di dema erk de balafirên şer ên ku ji keştiyê rabûne zêdetirî 10 hezar sortî kirine û milyonek û 500 hezar pound cebilxane avêtine cihên armanckirî.
Keştiya USS George Washingtonê ya ku nû gihîştiye herêmê, dê erkê domandina hebûna leşkerî ya Amerîkayê ya li Rojhilata Navîn û çavtirsandina li hemberî Îranê wergire.
CENTCOMê destnîşan kir ku ev guherîn operasyoneke plankirî ya nûkirina hêzê ye û sînyala wê yekê da ku dê tevgera leşkerî ya li herêmê berdewam bike.
