Hewlêr (Rûdaw) - Helîkoptereke êrişê ya cureyê AH-64 Apache ya artêşa Amerîkayê li nêzîkî Tengava Hurmizê ket.
Hat diyarkirin ku her du pîlotên di helîkopterê de bi saxî hatine rizgarkirin.
Li gorî agahiyên ku ji berpirsên Amerîkayî hatine wergirtin, helîkoptera Apache duşemê dema ku li derdora Tengava Hurmizê li ser peywirê bû ketiye.
Piştî bûyerê li herêmê dest bi xebatên lêgerîn û rizgarkirinê hat kirin û her du personelên di helîkopterê de bi awayekî ewle hatin veguhastin.
Sedema ketinê hîn ne zelal e
Li gorî nûçeya The New York Timesê, hîn ne diyar e bê ma helîkopter ji aliyê Îranê ve hatiye xistin an ji ber pirsgirêkeke teknîk ketiye yan jî ji ber sedemeke din qeza kiriye.
Çavkaniyeke ku ji mijarê agahdar e, diyar kir ku li ser sedema bûyerê dest bi lêkolînê hatiye kirin.
Serokê Amerîkayê Donald Trump jî di daxuyaniya xwe de piştrast kir ku rewşa pîlotan baş e û ew hatine rizgarkirin.
Aloziya li herêmê didome
Bûyer piştî êrişên Îsraîl û Îranê pêk hat.
Artêşa Amerîkayê li dijî hewldanên Îranê yên ji bo astengkirina trafîka deryayî ya li Tengava Hurmizê, li herêmê çalakiyên leşkerî yên dijwar dike.
Di operasyonan de li gel helîkopterên Apacheyê, dronên MQ-9 Reaper û balafirên şer ên F/A-18 û F-35 jî tên bikaranîn.
Dibe ku yekem be
Tê diyarkirin ku Îranê ji destpêka şerê di 28ê Sibatê de heta niha nêzîkî 30 dronên MQ-9 Reaper xistine.
Hat ragihandin ku di heman pêvajoyê de hinek balafirên şer ên Amerîkayê jî bi “guleyên dost an jî dijmin” hatine xistin.
Berpirsan destnîşan kir ku eger bi temamî têkçûna helîkopterê were piştrastkirin, ev dê bibe yekem helîkoptera Apacheyê ku Amerîkayê di dema pevçûnan de ji dest daye.
Helîkopterên AH-64 Apache yên ku bi mûşekên Hellfire hatine xemilandin, wekî yekê ji amûrên êrişê yên herî bibandor ên artêşa Amerîkayê tên dîtin.
Helîkopter, bi taybetî li Tengava Hurmizê ji bo rêlibergirtina êrişên keştiyên biçûk ên bilez û ji bo tunekirina dronan geran dikin.
Hebûna leşkerî ya Amerîkayê
Di mehên dawî de balê dikişîne ku hêzên Amerîkayê li nêzîkî giravên di bin kontrola Îranê de û li peravên Îranê tevdigerin.
Ev yek nîşan dide ku dema têkiliyên dîplomatîk ên ji bo jinûvevekirina Tengava Hurmizê yên di navbera Washington û Tehranê de didomin, Amerîka guvaşa xwe ya leşkerî jî didomîne.
Amerîkayê ragihandibû ku wan li hemberî dorpêça deryayî ya Îranê, di 13ê Nîsanê de dorpêça xwe ya li dijî benderên Îranê daye destpêkirin.
Fermandariya Hêzên Navendî ya Amerîkayê (CENTCOM) eşkere kir ku ji wê rojê ve 134 keştiyên bazirganiyê yên ku dixwest derbasî Îranê bibin an jî ji Îranê derkevin hatine vegerandin.
Her wiha Hêzên Deryayî yên Amerîkayê diyar kir 7 keştiyan piştî hişyariyan jî rêya xwe neguhertiye û ew hatine tunekirin.
Hat diyarkirin ku di nav wan keştiyan de tankereke petrolê ya bi alaya Palauyê jî heye ku duşemê ji Kendava Umanê ber bi Îranê ve diçû.
