Hiqûqnasê Kurd hêjayî Xelata Mandela ya 2025an hat dîtin

Hewlêr (Rûdaw) - Hiqûqnasê Kurd Zeyto Siyan, ji ber xebatên xwe yên bi biryardar ên li ser mafên mirovan û mafên girtiyan hêjayî Xelata Nelson Mandela ya 2025an hat dîtin.

Zeyto Siyan xelata xwe di encama nirxandina lijneyeke hilbijêr a navneteweyî de wergirt.

Pisporê yasaya navneteweyî yê ji Hewlêrê Zeyto Siyan ku bi xebatên xwe yên di qada parastina mafên mirovan de tê naskirin, bû xwediyê Xelata Nelson Mandela ya îsal.

Xelata ku bi armanca başkirina şert û mercên girtîgehên li Îraqê û parastina mafên girtiyan tê dayîn, wekî nîşaneya keda 20 salan a Siyan a di vî warî de hat qebûlkirin.

Ji aliyê komîteyeke navneteweyî ve hat hilbijartin

Zeyto Siyan derbarê xelatê de ji Rûdawê re axivî û diyar kir ku pêvajoya hilbijartinê di qonaxeke nirxandinê ya gelekî hûr û kûr re derbas bûye.

Siyan got, "Lijneyeke ku ji pisporên warê mafên mirovan pêk tê, kurtejiyan û xebatan dinirxîne.

Di vê lijneyê de pisporên navneteweyî yên ji Misir, Urdin, Libnan û Îraqê cih digirin."

Ji bo mafên girtiyan gaveke girîng

"Xelata Mandela" her sal bi awayekî sîstematîk ji aliyê Tora Dadweriyê ya ji bo Girtiyan a li Îraqê ve tê dayîn.

Ev xelata ku ji aliyê Rêxistina Alîkariya Gel a Norwecê (NPA) ve jî tê piştgirîkirin, did wan kes û saziyan ku armanca wan zêdekirina kalîteya jiyana girtiyan a li seranserê Îraqê, parastina mafên wan ên yasayî û teşwîqkirina standartên mirovî di sîstema girtîgehan de ye.

Zeyto Siyan: Di têkoşîna mafên mirovan de 20 sal ezmûn

Zeyto Siyanê ku sala 1966an li Hewlêrê ji dayîk bûye, bi pisporiya xwe ya kûr a di warê yasaya navneteweyî de hem li Herêma Kurdistanê û hem jî li seranserê Îraqê di warê parastina mafên mirovan de wekî yek ji navên herî jêhatî tê naskirin.

Siyan ku di rêxistinên civaka sivîl û mekanîzmayên navneteweyî de xwedî ezmûneke kûr a zêdetirî 20 salan e, bi taybetî di bin banê Mîsyona Alîkariyê ya Îraqê ya Neteweyên Yekbûyî (UNAMI) de wekî Berpirsê Mafên Mirovan ê Îraq û Herêma Kurdistanê erkên krîtîk girtine ser milê xwe.

Hiqûqnasê bi ezmûn ê ku di kariyera xwe ya pîşeyî de di bin banê rêxistina Amerîkayê ADFyê de berpirsyariyên girîng ên wekî kordînatoriya herêmê jî wergirtine, zewiciye û bavê çar zarokan e.