Hewlêr (Rûdaw) - Ji ber barîna berfê, li piraniya rêyên sereke yên navbera bajar û bajarokên Herêma Kurdistanê astengî çêbûn û gelek rêyên sereke hatin girtin.
Bi sedan welatî ku jin û zarok jî di nav de ne, di nava otomobîlên xwe de asê mane û daxwaza alîkariyê dikin.
Welatiyekî bi navê Ehmed Teyib ji Rûdawê re got:
"Em nêzîkî 200 otomobîlan in, li pişta Haciyawayê li Çiyayê Makokê asê mane û otomobîl dişemitin. Jin û zarok di otomobîlan de ne û em daxwaza alîkariyê dikin."
Rêya Hewlêr-Koyeyê
Rêya Hewlêr-Koyeyê ji ber berfê girtî ye û gelek otomobîl asê mane.
Welatiyekî din ê bi navê Ebdulah Şemo got,"Berfeke zêde heye û tenê otomobîlên bilind û 4x4 derdikevin.
2 saet in em rawestiyane. Beşek ji otomobîlan benzîna wan nemaye. Werin hawara me."
Rêya Hewlêr-Şeqlaweyê
Li ser rêya Hewlêr-Şeqlaweyê jî çûn û hatin rawestiyaye.
Huner Ekrem diyar kir ku her du aliyên Tunela Pîrmamê girtî ne û bi sedan otomobîl asê mane.
Rêya Simaqûlî-Ranyeyê
Rêya Simaqûliyê ya ber bi Ranyeyê ve jî girtî ye.
Serkewt Mihemed got, "Zêdetirî 300 otomobîl asê mane û tewra otomobîlên 4x4 jî dernakevin. Ti tîmeke parastina sivîl li wir nîne."
Hişyariya Parastina Sivîlan
Berdevkê Parastina Sivîlan a Hewlêrê Şaxewan Seîd got,"Her welatiyekî ku di nav berfê de asê maye, bila pêwendiyê bi hejmara 115an re bike û cihê xwe) bişîne, em dê biçin hawara wan."
Berdevkê Parastina Sivîlan a Silêmaniyê Aram Elî jî hişyarî da welatiyan ku eger neçar nebin ji malên xwe dernekevin.
.webp&w=3840&q=75)
