Hewlêr (Rûdaw) - Serokwezîrê Herêma Kurdistanê Mesrûr Barzanî bi boneya bidawîbûna hilbijartinên Parlamentoya Îraqê peyamek belav kir û ragihand, "Hêvî dikim nûnerên ku baweriya dengderan werdigrin, bibin nûnerên rasteqîn ên xelkê û parêzvaniyê li mafên destûrî yên xelkê Kurdistanê bikin."
Serokwezîr Mesrûr Barzanî di destpêka peyama xwe de diyar kir ku pêvajoya hilbijartinan bi serkeftî bi dawî bûye û pîrozbahî li xelkê Îraqê û bi taybetî li xelkê Kurdistanê kir ji ber ku beşdarî vê pêvajoyê bûn û maf û erkên xwe yên niştimanî bi cih anîn.
"Spasî ji bo hêzên ewlehiyê"
Mesrûr Barzanî her wiha spasiya Komîsyona Bilind a Serbixwe ya Hilbijartinan, hêzên ewlehiyê, asayîş, polîs û Pêşmergeyan kir ji bo serxistina pêvajoya dengdanê û rola wan a berpirsyarane di parastina ewlehî û selametiyê de.
Mesrûr destxweşî li hemû nûner û çavdêrên biyanî û navxweyî kir û hêvî kir ku bi emanetî rêz li dengê dengderan bê girtin.
"Parêzvaniya mafên destûrî bikin"
Serokwezîr Barzanî hêvî kir ku nûnerên nû parêzvaniyê li mafên destûrî yên xelkê Kurdistanê û statuya Herêma Kurdistanê bikin û got:
"Hêvî dikim li Îraqeke federal û demokratîk ji bo bicihanîna hemû mafên rewa yên gelê me serdemeke nû dest pê bike û encamên hilbijartinê bibin wesîleya baştirbûna jiyan û debara welatiyên Îraqê û bihêztirbûna pêgeha Herêma Kurdistanê û li ser bingeha destûr û rêkeftinan û rêzgirtina li statuya destûrî ya Herêma Kurdistanê, çareserkirina bingehîn a pirsgirêkên di navbera Herêma Kurdistanê û Hikûmeta Federal de."
.webp&w=3840&q=75)
