Hewlêr (Rûdaw) - Hejmarek hunermend, nivîskar, akademîsyen û çalakvanên li diyasporayê li hemberî rewşa Herêma Kurdistanê dilgiraniya xwe anî zimên û hişyarî da ku kûrkirina nakokiyên siyasî, destkeftî û statuya Herêma Kurdistanê dixe metirsiyeke mezin.
Hejmarek hunermend, nivîskar, akademîsyen û çalakvanên li diyasporayê daxuyaniyeke hevpar belav kir û anî zimên:
“Em bangî Partiya Demokrat a Kurdistanê (PDK), Yekîtiya Niştimanî ya Kurdistanê (YNK) û hemû hêzên siyasî yên Herêma Kurdistanê dikin ku nakokiyên xwe bi rêya diyalog û lihevkirineke aştiyane çareser bikin.”
“Statuya Herêma Kurdistanê dikeve ber metirsiyê”
Di daxuyaniya Kurdên diyasporayê de hat diyarkirin:
“Pêdagiriya li ser kûrkirina nakokiyên siyasî û rikbaziyên desthilatê, ne tenê aramiya siyasî û civakî, di heman demê de destkeftî û statuya Herêma Kurdistanê jî dixe ber metirsiyeke mezin.”
Ew koma kesayetiyên diyasporayê di wê baweriyê de ye ku rêya sereke ya ji bo derketina ji qeyrana siyasî û çareserkirina pirsgirêkên desthilatdariyê, bihêzkirina rola parlamentoyê û pêkanîna hikûmeteke niştimanî ye.
“Parastina statuyê erkekî neteweyî û dîrokî ye”
Di beşeke din a daxuyaniyê de hat destnîşankirin:
“Hebûna Herêma Kurdistanê û saziyên wê ji bo Kurdên li her çar parçeyên Kurdistanê û cîhanê cihê serbilindiyê ye.
Loma parastina aramî û statuya wê ne tenê xwestekeke siyasî ye, di heman demê de erkekî neteweyî û dîrokî ye.
Di vê qonaxê de berpirsyariyeke mezin dikeve ser milên PDK û YNKyê.”
Wan nivîskar û çalakvanên diyasporayê tekez kir ku serkeftin an têkçûn ne tenê ya partiyekê an jî serokekî ye, ya hemû gelê Kurd e û pê de çû:
“Ji ber vê yekê girîng e ku hemû aliyên Herêma Kurdistanê di demeke kurt de berjewendiyên neteweyî deynin ser berjewendiyên partiyan û erkên xwe bi cih bînin.”
“Mafên neteweyî di ser her tiştî re ne”
Di dawiya daxuyaniyê de hat gotin:
“Mafê her partî, rêxistin û welatiyekî Kurdistanê ye ku bi azadî nêrîn û ramanên xwe yên li ser bûyeran bîne zimên û bi rêya pêşbirkeke aştiyane û demokratîk ji bo pêkanîna wan bixebite lê belê mafê neteweyî di ser hemû mafên takekesî, partîtî û rêxistiniyê re ye.”



