Hewlêr (Rûdaw) - Coya avê "Naruceya Hacî Cercîsê Jorîn" a li nahiyeya Şiwanê ya Kerkûkê, bi awayê fermî di Lîsteya Tesîsên Çandî yên Cîhanî yên Avdaniyê de hat tomarkirin.
Birêvebirê nahiyeyê da zanîn ku tenê li devera Şiwanê zêdetirî hezar şûnwarên dîrokî hene.
Di çarçoveya xebatên 26emîn Kongreya Navneteweyî ya Avdan û Ziwakirinê (ICID) de ku li bajarê Marsîlyayê yê Fransayê hat kirin, îro (16ê Çiriya Pêşîna 2026an) Komîteya Navneteweyî ya Avdanê bi awayê fermî ev coya li Kerkûkê xiste nav lîsteya şûnwarên cîhanî.
Ev gav wekî naskirineke navneteweyî ya jêhatîbûna endezyarî û dîrokî ya Îraqê ya di warê birêvebirina çavkaniyên avê de tê qebûlkirin.
"Ji bo Kerkûkê serbilindiyeke mezin e"
Birêvebirê Çavkaniyên Avê yê Kerkûkê û Nûnerê Wezareta Çavkaniyên Avê ya Îraqê Dr. Zekî Kerîm Ehmed di merasîmeke taybet de li Fransayê bawername û mertala danasîna wê coya avê wergirt.
Dr. Zekî Kerîm Ehmed ji Rûdawê re ragihand:
"Ev destkeft ji bo Îraq, Kerkûk û Wezareta Çavkaniyên Avê serbilindiyeke mezin e. Ji ber ku ev co xwedî nirxekî bilind ê dîrokî û endezyariyê ye û kûrahiya pisporiya Îraqiyan a di warê birêvebirina avê de nîşan dide."
Ehmed her wiha anî zimên ku ev tomarkirin dê bibe handêrek ku şûnwarên din ên avê jî bên belgekirin.
Geşbûna sektora geştyariyê ya li Şiwanê
Li aliyê din, Birêvebirê Nahiyeya Şiwanê Biryar Şiwanî ji Rûdawê re got:
"Coya Naruceya Hacî Cercîsê beriya du salan ji bo vê armancê hatibû namzedkirin. Ev co wekî toreke avê ya dîrokî dixebite."
Birêvebirê nahiyeyê amaje bi wê yekê jî kir ku li gorî agahiyên Daîreya Şûnwara a Kerkûkê, li devera Şiwanê zêdetirî hezar şûnwaran hene lê hinek ji wan hatine talankirin û got:
"Ev destkeft dê ji bo herêmê bibe sembolek û em dikarin ji bo baştirkirina aboriya gundan wekî projeyeke geştyariyê sûdê jê wergirin."
Sîstema endezyariyê ya coya avê
Ev coyên avêr yek ji kevnartirîn û aloztirîn sîstemên endezyariyê yên cîhanê ne ji bo dabînkirina avê.
Di vê sîstemê de bi rêya kolana rêzeke bîran û girêdana wan a bi hev re, ava bin erdê bêyî bikaranîna enerjiyê û tenê bi hêza kêşana erdê digihîje ser rûyê erdê.
Nahiyeya Şiwanê ji ber helkefta xwe ya cografî xwedî dîrokeke kevnar a vî cureyê avdaniyê ye.
Tomarkirina vê coyê ya di lîsteya cîhanî de dihêle ku wekî mîrateke mirovahiyê were parastin û parastina wê ji tunebûnê dibe erkekî navneteweyî.
