Hewlêr (Rûdaw) - Sê koçberên Kurd ên ku li Lîbyayê dema ku bi hêviya gihîştina Ewropayê bûn û zêdetirî 40 rojan di zindanan de mabûn, vegeriyan Herêma Kurdistanê.
Arî Îsmaîl yek ji wan ciwanan e ku ew rojên xeter ji Rûdawê re vegot, hişyarî da, "Divê kes rêya Lîbyayê ji bo gihîştina Ewropayê bi kar neyîne."
Sê koçberên din ên ku li Lîbyayê ji aliyê milîsên çekdar ve hatibûn dîlgirtin û paşê ji bo kampan hatibûn veguhastin, îro danê sibehê bi rêya Balafirgeha Navneteweyî ya Hewlêrê gihîştin malên xwe yên li Îdareya Serbixwe ya Raperînê ya li Silêmaniyê.
Arî Îsmaîlê 18 salî û 2 hevalên wî ku îro vegeriyan Herêma Kurdistanê, beşek ji koma 33 koçberên Kurd bûn ku 8ê Îlonê vegeriyan welatê xwe lê belê ji ber derengketina belgeyên fermî, vegera wan heta îro hatibû bipaşxistin.
"Çekdaran êrişî otêlê kir û çavên me girêdan"
Arî Îsmaîl ji Rûdawê re axivî û got ku kabûsa wan çawa şeva ku ew cara yekem gihîştin Trablusê dest pê kir û anî ziman:
"Şeva ku em gihîştin paytextê, em li otêlekê diman.
Komek milîsên çekdar êrişî otêlê kir.
Wan dest danî ser telefonên me û pirsîn, hûn çima hatine vir?
Me ji wan re got ku em hatine bixebitin.
Tevî vê yekê, wan dest û çavên me girêdan û em birin girtîgeheke nediyar."
"15 roj di hucreya yekkesî de"
Îsmaîl destnîşan kir ku şert û mercên girtîgehê pir dijwar bûn û got:
"Me nizanibû ku me dibin kîjan girtîgehê, rewşa me pir xirab bû.
Wan em 15 rojan di hucreya yekkesî de hiştin.
Dema ku em birin jûra lêpirsînê, çavên me jî girêdan."
Îsmaîl diyar kir ku ew piştî ku di hucreya yekkesî de hatin girtin, di bin çavdêriya polîsan de ji bo kampeke koçberan hatin veguhastin û got, "Rewşa li kampê xirabtir bû."
Em tenê di yek salonekê de diman ku zêdetirî 500 kesî tê de bûn.
Li wir, em bi 33 ciwanên Kurd re civiyan ku berê hatibûn girtin, bi tevahî, em 36 kes bûn.
Av pir qirêj bû ku nedihat vexwarin.
Em hemû nexweş ketin û alerjiyên çerm ên giran bi me re çêbûn."
"Wan 15 rojan derew li malbatên me kirin"
Ciwan piştî 17 rojan karîne malbatên xwe agahdar bikin, ew jî dema ku nûnerekî Balyozxaneya Îraqê ya Lîbyayê çûye kampê.
Arî Îsmaîl diyar kir ku wan ji bo ku bi rêya Lîbyayê derbasî Ewropayê bibin, her yek 17 heza dolar dane bazirganên mirovan û got:
"Dema ku em di girtîgehê de bûn, bazirganan 15 rojan rastiyê ji malbatên me veşart.
Wî derew li wan kir û got, zarok li cem min ewle ne lê ji ber sedemên ewlehiyê telefonên wan girtî ne."
Îsmaîl diyar kir wan nekarî biçin Ewropayê, 17 hezar dolarên ku dabûn wan bi paş de wergirtine û got ku 10 wêneyên pasaportên ciwanên din ên Kurd nîşanî wan dane û li Lîbyayê Kurdên din jî hene ku çarenivîsa wan nediyar e û di şert û mercên pir dijwar de ne.
"Divê kes vê rêyê bi kar neyîne"
Ariyê 18 salî diyar kir ku tevî ku hemû vîzeyên pêwîst û belgeyên fermî li cem wan hebûn jî, piştî ku bi awayekî yasayî ji Hewlêrê çûne wir, li Lîbyayê dîl hatine girtin û ev hişyarî da:
"Heger kesek dixwaze bibe koçber, divê qet neçe Lîbyayê.
Ev hewldana min a duyemîn bû.
Di rêwîtiya min a yekem de, ez 4 mehan asê mam û ji bo ku ez bêm berdan û vegerim Herêma Kurdistanê, neçar mam 5 hezar dolar fîdyeyê bidim."
Lîbya ku ji aliyê gelek komên çekdar û milîsan ve tê kontrolkirin, parçe bûye û yek ji rêyên herî xeternak ên cîhanê yên ji bo koçberan tê hesibandin.
Rayedar bi berdewamî welatiyan hişyar dikin ku nekevin destê bazirganên mirovan û rêya Lîbyayê bi kar neyînin.
