Hewlêr (Rûdaw) - Li parêzgeha Êlihê ya Bakurê Kurdistanê agir bi saloneke taybet a werzişê ket û di şewatê de 2 mirin.
Li gorî agahiyan, agir ji ber sedemeke ku hîn nehatiye diyarkirin bi salona werzişê ketiye.
Di agahdarkirina ewil de hat gotin ku nêzîkî 30 kes di hundir de asê mane.
Piştî ku agir pê ket, gelek tîmên AFAD, UMKE, tîmên agirvemirandinê, tenduristî û polîs çûne cihê bûyerê.
2 kes mirin
Parêzgarê Êlihê Ekrem Canalp li ser rewşa dawî ya şewatê agahî dan.
Canalp da zanîn ku di şewatê de 2 mirine.
Wî diyar kir ku ji 10 kesên ku ji dû bi bandor bûne, rewşa 9 kesan baş e.
Her wiha dermankirina kesekî ku bi giranî birîndar bûye jî didome.
Kesên asêmayî hatin rizgarkirin
Di kêliyên pêşî yên şewatê de gelek kes di avahiyê de asê mabûn.
Tîmên agirvemirandinê ji aliyekî ve midaxeleyî agir dikir, ji aliyê din ve jî hewl dida welatiyên di hundir de rizgar bikin.
Birîndar ji aliyê tîman ve ji avahiyê hatin derxistin.
Pişt re wan birîndar radestî tîmên tenduristiyê kirin û tîmên tenduristiyê birîndar veguhastin nexweşxaneyên bajêr.
Sedema şewatê ne diyar e
Hîn sedema derketina agir bi temamî nehatiye zanîn.
Hinek çavkaniyên xwecihî angaşt dikin ku dibe ku agir di beşa saunayê ya salona werzişê de dest pê kiribe.
Lê ev agahî hîn ji aliyê saziyên fermî ve nehatiye piştrastkirin.
Lêkolînên tîman ên li cihê bûyerê didomin.
Tê payîn ku sedema derketina agir piştî vekolînên teknîk bi awayekî zelal were destnîşankirin.
Parêzgarê Êlihê çû cihê bûyerê
Parêzgarê Êlihê Ekrem Canalp jî çû cihê bûyerê û ji tîman agahî wergirtin.
Hat ragihandin ku li ser bûyerê dest bi lêpirsînê hatiye kirin.
