Hewlêr (Rûdaw) - Tora Medyayî ya Rûdawê ji ber pêşengiya xwe ya di warê weşangeriya dîjîtal û malperê de 3 xelatên navneteweyî yên dotCOMMê standin ku yek ji van xelatan Platînîum û du jî Zêrîn in.
Xelata Platînîum dan platforma nûçeyan a Rûdawê.
Tora Medyayî ya Rûdawê îsal li ser asta Rojhilata Navîn bû yekane xwediyê xelata Platînîum a dotCOMMê.
Ev her 3 xelat îspat dikin ku Rûdaw saziyeke medyayî ya nifşê nû û nifşên paşerojê ye.
Her wiha nîşan dide ku ev sazî li gorî pîvanên cîhanî yên rojnamegeriyê dixebite.
Xelatên Rûdawê yên li dotCOMMê bi vî rengî ne:
1. Platînîum - Şiyanên înteraktîf: Platforma nûçeyan a nifşê paşerojê, Rûdaw.
2. Zêrîn - Nûçe û Medya: Di malpera nû ya Rûdawê de serdemeke nû ya vegotina nûçeyan.
3. Zêrîn - Serkeftina giştî ya tîmê: Di dema nakokiyên Rojhilata Navîn de 3,72 milyar bîner.
Xelatên dotCOMMê di pêşbaziyeke cîhanî de ji bo qedirgirtina karên bêhempa yên di warê nûjenkirina web û dîjîtalê de tên dayîn.
Ev pêşbazî ji aliyê Komeleya Pisporên Bazar û Pêwendiyan (AMCP) ve tê birêvebirin û nirxandin.
Komeleya Pisporên Bazar û Pêwendiyan (AMCP) sala 1994an hatiye avakirin.
Ew wekî yek ji mezintirîn û navdartirîn saziyên nirxandina karên nûjen ên di warê pêwendiyan de tê dîtin.
Platforma nû ya Rûdawê
Tora Medyayî ya Rûdawê 25ê Gulanê bi amadebûna hejmarek dîplomat û berpirsên biyanî platforma xwe ya nûjen nîşan da.
Amadeyan ev platform wekî xaleke werçerxanê ya di veguhastina dîjîtal a li herêmê de nirxand.
Wan tekez kir ku Rûdaw ji bo wan çavkaniyeke pêbawer û bilez e.
Xwendevan û bîner jî vê wekî bipêşketineke nû ya dîjîtal-medyayê ya li herêmê dibînin.
Medyaya dîjîtal a Rûdawê li ser platforman tomarkirina rekorên nû didomîne.
Di dema şerê Amerîka û Îsraîlê yê li dijî Îranê de hejmara bînerên Rûdawê gihîşt 3,72 milyarî.
Tenê vîdeo-nûçeyeke kontrolkirina rastiyan (fact-check) a Rûdawê li ser tora civakî ya Facebookê 471 milyon caran hat dîtin ku ji vê hejmarê 284 milyon dîtin tenê di nava 24 demjimêran de bûn.
Ev jî ji bo vîdeoyekê li ser Facebookê di nava 24 demjimêran de li hemû cîhanê hejmara herî bilind a bîneran e.
Tîma ciwan a Kurdistanê
Ev serkeftinên li pey hev ên platforma Rûdaw Dîjîtalê berhema karê tîmeke ciwan û jêhatî ya Kurdistanê ye ku bi profesyonelî platformên Rûdawê bi rê ve dibin.
Tora Medyayî ya Rûdawê bi perwerdekirin û pêdanê baweriya tam ev tîm ji bo pêşengiya di karê medyayî de amade kiriye.
Tora Medyayî ya Rûdawê dê di bipêşxistina şiyan û perwerdekirina ciwanên Kurdistanê ya di warên pêwendîdarî karê medyayî de berdewam be.
Tora Medyayî ya Rûdawê
30ê Tebaxa 2026an
