Hewlêr (Rûdaw) - Ji ber barana dijwar li devera Zaxgeyê ya Dêrsimê hezaz çêbû.
Ax, dar û kevirên ku ji çiyê hatin xwarê rê girt.
Çûn û hatina li ser rêya Dêrsim, Pilemûr û Erzinganê ji bo demekê qut bû.
Piştî xebatên paqijkirinê, rê careke din hat vekirin.
Gelek wesayît asê man
Baranê bi taybetî li navçeyên Pilemûr û Xozatê yên Dêrsimê çûn û hatin asteng kir.
Li devera Zaxgeyê ax û kevir ketin ser rêya Dêrsim û Erzinganê.
Ji ber hezazê rê hat girtin. Gelek wesayît asê man û rêzên dirêj ên wesayîtan çêbûn.
Li ser agahdarkirinê, tîmên kar û barên rêyan gihîştin cihê bûyerê.
Tîman bi makîneyên kar rê ji ax û keviran paqij kir û bi qedandina xebatan re, rê ji nû ve vebû.
Rêya Xozatê jî hatibû girtin
Li aliyê din, li ser rêya Dêrsim-Demîrqapî-Xozatê jî ji ber baranê çûn û hatin ji bo demekê rawestiya.
Piştî ku tîman kevir û parçeyên daran ji ser rê rakirin, ew rê jî careke din vebû.
Rayedaran hişyarî da şofêran da ku li deverên baran lê dijwar e wesayîtên xwe bi baldarî biajon.
Her wiha ji şofêran hat xwestin ku li hemberî metirsiya hezaz û herifîna lat û zinaran tedbîrên xwe bistînin.
