Hewlêr (Rûdaw) - 4 Erebên hawirde piştî ku qerebûya Madeya 140î wergirtiye, careke din zêdetirî 118 donim zeviyên kesekî Kurd li Kerkûkê dagir kirin.
Niha dosyeya wan li dadgeheke bajêr e.
Birêvebiriya Çandiniyê ya Kerkûkê nivîsa piştgiriyê ji bo malbata Kurd ji dadgehê re şandiye.
Ew zevî li gundê Tepegulê yê sînorê qezaya Dûzê ya Kerkûkê ne.
Dosyeya zeviyan li dadgehê ye
Nûnerê Cotkarên Sergeranê Mihemed Emîn ji Rûdawê re axivî û got:
“Dosyeya wî cotkarê Kurd niha li dadgehê ye. Zeviyên wan berê ji aliyê wan Erebên hawirde ve hatibûn dagirkirin.”
Li gorî gotina wî, Erebên hawirde piştî wergirtina qerebûyê ew zevî hiştibûn.
Madeya 140î çi dibêje?
Li gorî Madeya 140î ya Destûra Îraqê, her Erebên hawirde yên li navçeyên Kurdistanê yên dervey îdareya Herêma Kurdistanê 20 milyon dînaran û parçeyeke zevî werdigire.
Ev qerebû ji bo wê ye ku wan zeviyan bihêlin.
Wan ew zevî di çarçoveya pêvajoya Erebkirinê ya desthilata berê ya Îraqê de wergirtibûn.
Bi piştgiriya hêzê û bi gefan vegeriyan
Elî Omer Heme Mistefa warisê wê malbatê ye ku zevî li ser navê wan e.
Elî Omer Heme Mistefay Rûdawê re got, “Piştî sala 2003yan me zeviyên xwe bi paş ve wergirtin.
Lê sala 2016an careke din ew 4 cotkar bi piştgiriya hêzê û bi gefan vegeriyan ser zeviyên me. Em neçar man ku zeviyên xwe bihêlin.”
Ew zeviyê malbata Kurd a Kerkûkê, sala 1995an bi peymanê dabûn wan 4 kesan.
Hîn bersiva dadgehê nehatiye dayîn
Elî Omer Heme Mistefa diyar kir ku nivîsek ji dadgehê ji Birêvebiriya Xaniyên Dûzê re hatiye şandin.
Ev nivîs ji bo wê ye ku pêştrast bibin ka zevî li ser navê kê ne.
Lê hîn bersiva dadgehê nehatiye dayîn.
Li gorî nivîseke ku Birêvebirê Giştî yê Çandiniyê yê Kerkûkê Zuher Elî 14ê Tîrmeha 2026an ji Dadgeha Lêkolînê ya Dûbizê re şandiye, rastî derketiye holê.
Ew 4 cotkarên ku niha zevî di destê wan de ne, ti pêwendiyeke wan a yasayî bi wan zeviyan re nîne.
