Hewlêr (Rûdaw) - Destê sibehê bi 3 dronan êrişî Hewlêr û Silêmaniyê hat kirin û hemû dron li asmên hatin xistin û ti zererên canî çênebûn.
Derdora demjimêr 01:00ê 2 dron gihîştin asmanê Silêmaniyê.
Nûçegihanê Rûdawê Erkan Elî diyar kir ku dronan ti zererên canî çênekirine.
Yek ji wan dronan li asman hat xistin û bû sedema şewatekê.
Erkan Elî da zanîn ku agir di demeke kurt de hat vemirandin.
Li gorî vîdeoyeke ku welatiyan ji Rûdawê re şandiye, dron di ser nahiyeya Pîremegrûnê re derbas bûne û gihîştine Silêmaniyê ku nahiye li başûrrojavayê bajêr e.
Li Hewlêrê sîstema C-RAMê ket dewrê
Her wiha destê sibehê li asmanê bajarê Hewlêrê, dronek bi sîstema parastinê ya C-RAMê hat xistin û zerer çênebû.
Hêzên Amerîka, Brîtanya, Fransa û Almanyayê di vekişîneke ji nişka ve ya 72 saetan de, bi sedan leşker û sîstema sereke ya parastina asmanî ji Balafirgeha Navneteweyî ya Hewlêrê vekişandine.
Rûdawê zaniye ku roja şemiyê balona ku li asmanê Hewlêrê dihat dîtin, hatiye daxistin.
Kamerayên wê yên gelekî bipêşketî yên çavdêriya şev û rojê hene.
Balon bi bazineya 360 pileyî heta 50 kîlometreyî dibîne û çavkaniya hemû êrişan eşkere dike.
