Hewlêr (Rûdaw) - Li Kerkûkê di nava 48 demjimêran dawî de erdhejeke din hat tomarkirin.
Birêvebiriya Keşnasiyê ya Kerkûkê ragihand ku mezinahiya erdhejê 3,4 pile ye û li bajêr erdhejeke bihêz nayê çaverêkirin.
Birêvebirê Şaxa Kerkûkê ya Saziya Keşnasiyê ya Îraqê Hesen Elî ji Rûdawê re eşkere kir ku şeva înê saet 22:30î li rojhilatê Kerkûkê erdhejeke bi mezinahiya 3,4 pileyan rû daye.
Hat diyarkirin ku erdhej 10 kîlometreyan di bin erdê de, di navbera Leylan û Teqiye el-Cebarê de çêbûye ku nêzîkî 30 kîlometreyan dûrî navenda Kerkûkê ye.
Ev erdhej di nava 48 saetên dawî de erdheja sêyem e ku li Kerkûkê tê tomarkirin.
Hesen Elî li ser erdhejan diyar kir ku ev lerizîn ji ber tevgera xwezayî ya tebeqeyên erdê ne û got, "Ti metirsî nînin."
"Rîska erdhejeke mezin kêm e"
Pisporê Jeofîzîkê Prof. Dr. Aram Namîq jî ji Rûdawê re ragihand ku li rojhilat û bakurrojhilatê Kurdistanê erdhej tiştekî xwezayî ne.
Namîq destnîşan kir ku ev erdhej ji ber tevgera lewheyên tektonîk ên di qatên erdê de ne.
Li gorî lêkolînên wî, di 10 sedsalên dawî de li Kerkûkê erdhejeke wêranker çênebûye.
Ji ber vê yekê li bajêr erdhejeke mezin nayê çaverêkirin.
