Hewlêr (Rûdaw) - Endamê Komîteya Pêwendiyên Derve ya Parlamentoya Îraqê Zîrek Zêbarî ragihand ku Hikûmeta Îraqê hewl dide welatê xwe ji hevrikiya di navbera Amerîka û Îranê de dûr bixe.
Zîrek Zêbarî hişyarî da ku domandina aloziyan dê Îraqê rûbirûyî "krîzeke mezin a aborî" bike û metirsiyê li ser meaşên karmendan çêbike.
Zêbarî her wiha wî eşkere kir ku parlamento piştgiriyê dide operasyonên li dijî gendeliyê, lê "tirs" heye ku ev pêvajo ji bo "armancên siyasî" were bikaranîn.
Serokwezîrê Îraqê Elî Zeydî piştî serdana xwe ya Washingtonê, ji bo gotûbêjkirina dosyeyên ewlehî û aboriyê çû Tehrana paytexta Îranê.
Di heman demê de, Parlamentoya Îraqê jî li ser operasyona li dijî gendeliyê û krîza aborî ya welat rûniştineke vekirî li dar xist.
Hewldanên dûrxistina Îraqê ji şerê herêmî
Zîrek Zêbarî ji Rûdawê re axivî û got, "Armanca serdana Zeydî ya Îranê du mijarên sereke ne ku ew jî ewlehî û aborî ne.
Birêz Elî Zeydî peyama Hikûmeta Îraqê gihandiye aliyê Amerîkayî û îro jî digihîne aliyê Îranî.
Ew daxwaz dike ku Îraq ji wî şerê li herêmê rû dide were dûrxistin."
Zêbarî li ser gihîştina peymaneke ewlehiyê ya li gel Tehranê diyar kir ku ev yek "hinekî zehmet e."
Zêbarî sedema vê yekê wiha rave kir, "Peyama Îraniyan ew bûye ku aliyê Amerîkayî li her derêa ku hebe dê bibe armanc."
Wî parlamenterî her wiha da zanîn, her çend Elî Zeydî soza parastina serweriya Îraqê daye jî lê "heta niha ev yek nehatiye bicîkirin, ji ber ku rojane Îraq ji aliyê Îranê ve tê bombebarankirin."
Krîza darayî ya li Îraqê û kêmbûna hinartina petrolê
Hevdem li gel tevgerên dîplomatîk, Parlamentoya Îraqê li ser çar pirsên navxweyî civiya.
Zîrek Zêbarî derbarê vê yekê got ku rûniştina parlamentoyê bi awayekî vekirî û dûrî çavên medyayê tê kirin.
Li gorî Zêbarî, armanca rûniştinê gotûbêjkirina li ser têkoşîna li dijî gendeliyê û mijara aboriya Îraqê ye ku ber bi krîzeke darayî ve diçe.
Zêbarî hişyar da ku domandina aloziyan dê bandoreke rasterast li ser aboriya Îraqê bike û got:
"Dahata sereke ya Îraqê petrol e. Berê rojane 3,5 milyon bermîl dihatin firotin lê niha rojane kêmtir ji 500 hezar bermîlan tê firotin.
Dema dahata Îraqê kêm dibe, rasterast tirs dikeve ser meaşên karmendan ên Îraqê."
Li gorî zanyariyên Zêbarî, Elî Zeydî dê serdana Tirkiye, Sûriye û Erebistana Siûdî jî bike.
Armanca van serdanan vekirina boriyên petrolê ye ku di ser wan welatan re derbas dibin.
Zîrek Zêbarî li ser operasyona gendeliyê tekez kir ku parlamento wekî aliyê çavdêr biryar daye ku piştgiriya hikûmeta Elî Zeydî bike.
Zêbarî tevî vê yekê jî bal kişand ser hebûna dilgiraniyekê û got:
"Tirsek ji aliyê hinek fraksyon û parlamenteran ve heye ku ev pêvajo ji bo armancên taybet were bikaranîn.
Tirs ew e ku ev bibe diyardeyek û her kesê li dijî siyaseta hikûmetê be, bi tohmeta gendeliyê were desteserkirin.
Tirs tenê ev e, eger na hemû fraksyon piştgiriya vê operasyonê dikin."
