Hewlêr (Rûdaw) - Li gundekî navçeya Siwêregê ya parêzgeha Rihayê ya Bakurê Kurdistanê du xwişk ji bo hênikbûnê ketin avê lê piştî demekê winda bûn û xeniqîn.
Doh ber bi êvarê li gundê Meqteleyê yê Siwêregê bûyereke dilşewat qewimî.
Mervenur Çakirtaş (15) û xwişka wê Edanura (12) ku ji Stenbolê ji bo dîtina xizmên xwe hatibûn navçeyê, ji bo xwe hênik bikin ketin Bendava Ataturkê.
Her du xwişkan demekê melevanî (sobanî, avjenî) kir û pişt re di nav avê de winda bûn.
Gava kesên derdorê dît ku ew ji avê dernakevin, wan bi lez Navenda Rewşên Lezgîn a 112an agahdar kir.
Li ser agahdarkirinê cendirme, tîmên tenduristiyê, AFAD, ŞUAK û polîsên binavger çûn cihê bûyerê.
Li herêmê tedbîrên ewlehiyê hatin wergirtin û xebatên lêgerîn û rizgarkirinê yên li ser û binê avê dest pê kir.
Bi hevkariya tîmên lêgerînê û welatiyan, termên her du xwişkan hatin dîtin û ji avê hatin derxistin.
Piştî lêkolînên destpêkê yên li cihê bûyerê, termên wan ji bo otopsiyê rakirin Saziya Tiba Dadî ya Rihayê.
Hêzên ewlehiyê derbarê bûyerê dest bi lêpirsîneke berfireh kir.
