Balyozê Fransayê xatir ji Nêçîrvan Barzanî xwest

Hewlêr (Rûdaw) - Balyozê Fransayê yê Îraqê Patrick Durel ji bo ku erkê wî qediya xatir ji Serokê Herêma Kurdistanê Nêçîrvan Barzanî xwest.

Serokê Herêma Kurdistanê di hevdîtinê de spasiya Balyozê Fransayê kir û ji bo erkê wî yê paşerojê jê re serkeftin xwest.

Wî hewl û karên wî yên ji bo bipêşxistina pêwendiyên Fransayê yên li gel Îraq û Herêma Kurdistanê bilind nirxandin.

Berfirehkirina hevkariyan

Balyozê Fransayê jî spasiya Nêçîrvan Barzanî û aliyên pêwendîdar ên Herêma Kurdistanê kir ku her tim ji bo wî alîkar û piştgir bûne.

Patrick Durel bal kişand ser daxwaza welatê xwe ya ji bo bipêşxistina pêwendiyan û berfirehkirina hevkariya hevbeş a di hemû waran de.

Konsulê Giştî yê Fransayê yê Herêma Kurdistanê Yann Braem jî di hevdîtinê de amade bû.