Bîlançoya mayînan a li Herêma Kurdistanê

Hewlêr (Rûdaw) - Saziya Giştî ya Kar û Barên Mayînan a Herêma Kurdistanê amarên teqîn û xebatên paqijkirina mayînan ên 6 mehên pêşî yên sala 2026an eşkere kirin.

Li gorî daxuyaniyê, di nîvê yekem ê salê de ji ber mayînan 7 kes birîndar bûne û 2 kes mirine.

Serokê Saziya Giştî ya Kar û Barên Mayînan a Herêma Kurdistanê Cebar Mistefa ji Rûdawê re axivî û diyar kir ku metirsiya mayînan a li herêmê didome.

Cebar Mistefa bi amaran tabloya xemgîn a 6 mehên destpêkê yên îsal destnîşan kir.

Hewlêr û Silêmanî

Li gorî amarên ku Cebar Mistefa parve kirine, ji meha Kanûna Paşîn ve di encama teqînan de 7 kes birîndar bûne û 2 kes mirine.

Hat diyarkirin ku yek ji wan li Hewlêrê û yê din jî li Silêmaniyê miriye.

Cebar Mistefa li ser rewşa birîndaran agahî dan û got, "Gelek welatiyên me yên birîndar bûn, rastî kêmendamiya fîzîkî ya mayînde hatin.

Piraniya bûyerên birîndarbûnê li herêmên çolter ên Soranê qewimîn."

200 hezar metreçargoşe hat paqijkirin

Cebar Mistefa anî zimên ku xebatên paqijkirina mayînan bê navber didomin û behsa serkeftinên qadê yên 6 mehên dawî kir.

Li gorî agahiyan, tîman 2 zevî û 3 qadên şer ên kevn ku rûberê wan dike 200 hezar metreçargoşe bi tevahî ji mayînan paqij kirine.

Di vê pêvajoyê de, 437 mayînên dijîpersonel û dijîtank û 26 hezar û 583 teqemeniyên neteqiyayî yên curbicur hatine tunekirin.

Têkoşîn ji 1992yan ve didome

Xebatên paqijkirina paşmayên şer ên li Herêma Kurdistanê sala 1992yan dest pê kir.

Li gorî amarên saziyê, wê demê herêmeke berfireh a nêzîkî 776 kîlometreçargoşeyî wekî herêma bimayîn hatibû destnîşankirin.

Di encama xebatên de heta niha 563 kîlometreçargoşeyên vê herêmê hatine paqijkirin û ji bo bikaranîna xelkê hatine vekirin.

Li gorî sala borî rewş çawa ye?

Her çi qasî amarên eşkerekirî nîşan bidin ku li gorî sala borî di hejmara miriyan de daketinek heye jî, ev yek nîşan dide ku metirsî hîn jî cidî ye.

Di tevahiya sala 2025an de li Herêma Kurdistanê 34 kes bûn qurbaniyên mayînan û di van bûyeran de 12 kes mirin.

Rayedar hişyariya xwe didomînin û ji welatiyan, bi taybetî jî ji wan kesên ku li herêmên sînorî û qadên şer ên kevn dijîn, dixwazin ku xwe ji herêmên nîşankirî dûr bigirin.