Hewlêr (Rûdaw) - Bihayê petrolê ji sedî 2 bilind bû û bihayê petrola brent gihîşt 107,16 dolaran.
Banka Goldman Sachs, ji ber rîskên dabînkirina petrolê ya li Rojhilata Navîn û îhtimala gurbûna şer û pevçûnan, pêşbîniya xwe ya ji bo bihayê petrola brent a Kanûna Pêşîn kir nêzîkî 90 dolaran.
Di bazarên petrolê yên global de bihayê bermîla brent, ji 16ê Îlonê ve cara yekem e ku ji 107 dolaran derbas bû.
Li gorî amarên dan û standina bazaran, bihayê bermîla brent li gorî sala berê ji sedî 2,33 zêde bû û gihîşt 107,16 dolaran.
Bihayê bermîla petrola xav ku wekî petrola xav a Amerîkayê tê nasîn li gorî sala berê ji sedî 2,21 bilind bû û bi 93,90 dolaran hat firotin.
Goldman Sachs pêşbîniya xwe ya ji bo petrola brent bilind kir
Goldman Sachs rîskên li ser dabînkirina petrola Rojhilata Navîn û îhtimala gurbûna şer a li herêmê li ber çavan girt û pêşbîniya xwe ya li ser bihayê petrola brent a ji bo Kanûna Pêşîn bilind kir.
Analîstên bankê, pêşbîniya xwe ya ji bo bihayê brent ku berê wekî 85 dolar pêşbînî dikirin, derxistin 90 dolaran.
Analîstan di nirxandina xwe de bal kişand ser bandora bipêşketinên li Rojhilata Navîn a li ser bazarên petrolê yên global.
Hat diyarkirin ku guncandina dabînkirina petrola herêmê bi mercên nû re di nav wextê de dikare zexta li ser bihayan kêm bike.
Her wiha hişyarî hat dayîn ku ger şer û pevçûn dîsa dijwar bibin, dibe ku di bihayên petrolê de zêdebûnên girîng çêbibin.
Prîma rîska jeopolîtîk ji 20 dolarî zêdetir e
Analîstên Goldman Sachs pêşbînî kir ku bandora rîskên ji ber geşedanên jeopolîtîk li ser bihayên petrolê, ji bo her bermîlekê ji 20 dolarî zêdetir e.
Îhtimala qutbûna dabînkirina petrolê ya li Rojhilata Navîn û nediyariyên derbarê şer, bandor li ser biryara bankê kir û pêşbîniya xwe ya petrola brent bilind kir.
Ji bo petrola xav a Amerîkayê bendewariyeke cuda ya bihayê heye
Goldman Sachs ji bo petrola xav a Amerîkayê (WTI) jî pêşbîniyên xwe yên bihayan parve kir.
Bankê diyar kir ku ji ber bandora lêçûnên bilind ên şandina bi keştiyan ên di navbera Amerîka û Ewropayê de, bihayê petrola WTIyê bi rengekî neasayî nizm maye.
Li gorî pêşbîniyên Goldman Sachs, tê hêvîkirin ku bihayê bermîla petrola WTIyê di Kanûna Pêşîn de bibe 81 dolar û di sala 2027an de jî dakeve asta 73 dolaran.
