Hewlêr (Rûdaw) - Bihayê onseke zêr îro 14 dolaran daket û ons bi 4 hezar û 60 dolarî hat firotin.
Bankeya Amerîkayê jî pêşbîniyên xwe yên li ser bihayê vî madenê giranbiha kêm kirin.
Artêşa Amerîkayê ragihand ku wan ji bo ku Tengava Hurmizê vekirî bimîne êrişî Îranê kiriye.
Îranê jî bi êrişkirina ser Behrêyn û Kuweytê bersiv da.
Pêşbîniyên li ser rêjeya faîzê
Şîrovekarê payebilind ê bazarên darayî yê li şirketa Oandaya Kelvin Wong diyar kir:
"Sedema ku piştgiriyê dide vê pêla daketina zêr, hêviya bazarê ya ji bo zêdekirina ducare ya rêjeya faîzê ya ji aliyê Banka Federal a Amerîkayê ve ye ku dibe ku di çaryeka yekem a sala pêşiya me de pêk were.
Piştî pevçûnên doh, peymana agirbesta demkî ya navbera Amerîka û Îranê niha li ser bingeheke lerzok e, loma dibe ku rewş careke din nearam bibe."
Amar û pêşbîniyên Bank of Americayê
Niha bazirgan û veberhêner wisa difikirin ku îhtimal heye îlona îsal rêjeya faîzê li Amerîkayê bi rêjeya ji sedî 68 were zêdekirin.
Ew ji bo meha kanûna paşîn a sala bê jî vê rêjeyê wekî ji sedî 87 dibînin.
Bank of Americayê jî ragihand ku ew pêşbîniya xwe ya ji bo navîniya bihayê zêr a sala 2026an bi rêjeya ji sedî 14 kêm dike û dadixe 4 hezar û 360 dolarî (ons).
Bankê sedema vê biryarê wekî tundkirina polîtîkaya neqdî ya ji aliyê Banka Federal a Amerîkayê ve nîşan da.
.webp&w=3840&q=75)
