(1)
بەقەولی ئێرانییەكان (سەفەری جەنجاڵ)ی سەرۆكی هەرێمی كوردستان (كە میدیای ئێرانی بە سەرۆكی پارتی دیموكراتی كوردستان) ناوی دەبات! بۆ سعودیە، ئیمارات و دوابەدواشی بۆ توركیا، قووڵایی پەیوەندیی بارزانیی لەگەڵ ئەو بەرەیەدا نیشان دا كە هاوكات هەر سێ وڵاتیش لە ژێر چەتری ئەمریكادان.
مەسەلەكە لایەنی سۆزداری نییە، بەڵام تەنیا یەك نموونەی بچووك، میدیای رەسمیی ئێران سەرۆكی وڵاتێك بە (شەرواڵ لەبەر) و (سەرۆكی حیزب) ناو دەبات، چی لە دەستی دێت بۆ كەمكردنەوە لە رۆڵی بارزانی دەیكات، بەڵام هەمان رۆژ و لە ئانكارا فەرشی سوور بۆ سەرۆك رادەخرێت و ئاڵای كوردستان (كە ئەوە لە مێژووی دەوڵەتی توركیادا نموونەی نەبووە) هەڵدەكرێت.
دەمێكە لە وڵاتانی ئەوروپا لە پێشوازیی كاك مەسعوددا، ئاڵای كوردستان لە تەنیشت ئاڵای وڵاتی بەناو عێراق دادەنرێت، بەڵام دانپێدانانی توركیا بەو ئاڵایەی ئێستای كوردستانی باشوور (كە هێشتا پەكەكەش دانی پێدا نانێت!) پتر لە مانایەك هەڵدەگرێت. بارزانی بۆ لە ئانكارا بوو؟
هەفتەی رابردووش نووسیبووم، بارزانی لە پرۆسەی سیاسی لە بەغدا كشاوەتەوە و هیچ ئومێدێكیش شك نابات، كارە دروستەكەش هەر ئەوەیە كە ئەو دەیكات. بارزانی بۆ دابەشكاریی دوای شەڕی مووسڵ لە ئانكارا بوو.
ئەوانیش پێیانگوت كە ئەگەر ئێوە بەنیازی سەربەخۆیین، ئەوا با خۆمان لەگەڵ هەڵكردنی ئاڵاكەشتان رابێنین. چونكە دەمێكە توركیا لەڕووی ئابووری و وزەوە وەك دەوڵەتێكی سەربەخۆ مامەڵە لەگەڵ كوردستان دەكات و هاتنی سوپای توركیاش بۆ قووڵایی خاكی كوردستان بۆ پاراستنی سەربەخۆیی كوردستان دەبێت، بەغدا و ناوەندەكانی دیكەش باش لە ئامانجی توركیا تێگەیشتوون، بۆیە وا قوڕ بۆ سەروەریی خاك و دەوڵەتی عێراق دەپێون. توركیا چیتر نایەوێت سێ لای بە دەوڵەتی شیعی دەورە درابێت، دوویان (سووریا و عێراق) وا لەناو دەچن و ئەوكاتە تەنیا دەمێنێتەوە ئێران.
وەكو هەمیشە كە بارزانی دەچێتە ئانكارا، یان شاندێكی پایەبەرزی تورك دێتە كوردستان، خێرا وەفدێكی یەكێتی یان خۆی بە بەغدادا دەكات یان تاران! ئەگەر ئەوەش نەبوو، شاندێكی هەدەپە لە سلێمانی دادەبەزێ!
مۆدێلی ئەو مانۆڕە سیاسییە هەرزانانە بەسەر چووە و لەسەر لێواری یەكلابوونەوەین.
بارزانی دەوڵەتی كوردستان رادەگەیەنێت تەنانەت ئەگەر سنووری ئەو دەوڵەتە لە دوو پارێزگاشدا بێت، چارەنووسی ئەو دەوڵەتەش وەكو دەوڵەتەكەی مەلیك مەحموود نابێت و جیهان بە خۆشحاڵییەوە پێشوازیی لێ دەكات. ئەوانەیش كە لەناوخۆدا دژی دەوەستنەوە، دەبێ وەڵامیان بۆ مێژوو هەبێت.
میلیشیای گۆڕان
(2)
لە كاتێكدا كە وا خەریكە شەڕی داعش یەكلایی دەبێتەوە و هەموو لایەك خەریكی حساباتی دوای داعشە، تازە بە تازە و لە میدیاكانەوە باسی دروستكردنی هێزی چەكداری لەلایەن بزووتنەوەی گۆڕانەوە دەكرێت.
راستییەكەی ئەوەیە كە ئەم نیقاشە لەناو بزووتنەوەی گۆڕاندا شتێكی تازە نییە و دوابەدوای رووداوەكانی 17ی شوبات، قسە لەسەر ئەوە دەكرا كە گۆڕان شانەی چەكداریی نهێنی لە شاروشارۆچكەكان دروست بكات. هەموو دەمێ ئەو نیقاشە لەناو گۆڕاندا بەو ئاراستەیەدا دەشكایەوە كە گۆڕان سەرباری ئەوەی بەشێكی زۆری كادر و پێشمەرگەی كۆنی یەكێتی تێدایە، بەڵام بزووتنەوەیەكی سیڤیلە و بوونی هێزی چەكدار زیان بە ئامانجەكانی دەگەیەنێت، چونكە رێكخستنەوە و یەكخستنەوەی هێزی پێشمەرگە یەكێك لە ئامانجەكانیان بووە. تەنانەت بوونی هێزی پێشمەرگەیان بەو شێوەیەی ئەوسا بە میلیشیا دەچواند تا هێزی نیزامی.
ئەمڕۆ كە وا خەریكە پێشمەرگە دەبێتە هێزێكی مۆدێرن و تا راددەیەكی زۆریش یەكیگرتووە، دروستكردنی هێزی چەكداری دیكە لە دەرەوەی ئەو هێزە، لەلایەن حكومەت و پێشمەرگەوە وەك میلیشیا مامەڵەی لەگەڵ دەكرێت و پتر لەوەی ببێ بە وەسیلەیەك كە گۆڕان وزەی لێ وەربگرێت، هێندەی دیكە بە خراپ بەسەریاندا دەشكێتەوە.
توركیا و پەكەكە
(3)
لەوەتەی هاتنی سوپای توركیا بۆ كوردستان، میدیاكانی پەكەكە و پاشكۆكانی لە سلێمانی، دنیایان لێبووە بە چەرمی چۆلەكە. رۆژ نییە دەیان سیناریۆ بڵاونەكەنەوە. هەمان ئەوانەی كە پێشتر دەیانگوت داعش بە هاوكاریی بارزانی هاتووەتە مووسڵ و پەلاماری كوردستانی رۆژئاوای داوە، ئەمڕۆ دیسان قەوانی تازەیان تۆمار كردووە!
هاتنی فەیلەقی قودس و تەراتێنی ئێران و حەشدی شیعی (تەنانەت بەستنی هاوپەیمانێتی لەگەڵیان) هیچ كێشەیەك و گرفتێكی بۆ سەروەریی نییە، تەنیا توركیا خەتی سوورە!
زۆر ناخۆشە ئەو بەراوردە بكرێت، بەڵام 18 ساڵە، هەزار سەربازی تورك لە كوردستان جێگیرن، تا ئێستا كەس بیستوویەتی یەك سەربازی تورك توانیبێتی پەنجە بۆ هاووڵاتییەك درێژ بكات! بەڵام باجی جێگیربوونی هێزەكانی پەكەكە لە كوردستانی باشوور، چۆڵبوونی سەدان گوند، تۆپباران و گیان لەدەستدانی سەدان هاووڵاتیی بێدیفاع بووە كە بەردەوام پەكەكە وەك قەڵغانی مرۆیی بەكاری هێناون!
هاوكاریی یەكێتی و پەكەكە لەگەڵ رژێمی بەعسی سووریا، حەشدی شیعی و ئێران، چۆڵبوونی یەكجاریی سەعدیە لە كورد، رژانی خوێنی دەیان هاووڵاتی و پێشمەرگە و نائارامی و پێكدادانی بەردەوام لە جەلەولا و توزخورماتوو، هیچ نییە، بەڵام هاتنی توركیا خیانەتە!
ئەو توركیایەی كە پەكەكە لە كوردستانی رۆژئاواوە و بەڕێگەی كوردستانی باشوور رۆژانە نەوتی پێ دەفرۆشێت.
پەكەكە دەبێ واز لە شۆی سیاسی و سەربازی بهێنێ، لە ژێرەوە لەگەڵ پارتی كۆدەبێتەوە و لەسەرەوە شتێكی دیكە دەڵێت. پەكەكە زوو یان درەنگ دەبێ بگەڕێتەوە سەر مێزی دانوستاندن لەگەڵ توركیا و ببێتە بەشێك لە سەقامگیریی ناوچەكە، ئەگەرنا دوای نەمانی داعش ئەو پێگەیەی لە رۆژئاواش هەیانە دەیكەن بە قوربانی ئەم و ئەو.
.jpg&w=3840&q=75)
