رووداو - هەولێر
رێکخراوی داعش نامیلکەیەکی بڵاوکردەوە کە یاسا و رێساکانی ئەو رێکخراوە بۆ ژیانی سێکسی چەکدارەکانی لەخۆدەگرێت.
لە نامیلکەکەی داعشدا کە لەلایەن دەزگای لێکۆڵینەوەی میدیایی رۆژهەڵاتی ناوەڕاست لە ئەمریکا MEMRI یەوە ئاشکراکراوە، فەتوا دەدرێت بۆ چەکداران کە لەگەڵ بە کۆیلەگرتنی کچان، پەیوەندی سێکسیان لەگەڵ بکرێت بۆ لابردنی پەردەی کچێنییان. هاوکات رێگەدەدرێت یەک چەکدار دوو خوشک بە کۆیلەبگرێت، بەڵام نابێت لە یەک کاتدا سێکس لەگەڵ هەر دووکیان بکات.
بە پێی لێکدانەوەیەکی پسپۆڕانی MEMRI ، ئەم دەستەواژەیە مانای ئەوەیە چەکدارانی داعش پەیوەندی سێکسی لەگەڵ چەند ژنێکدا لە یەک کاتدا دەکەن، بۆیە بە پێوسیتی دەزانن سێکسکردن لەگەڵ دوو خوشک لە یەک کاتدا قەدەخە بکەن.
لە بەشێکی دیکەی نامیلکەکەدا هاتووە کە ئەگەر بە کۆیلە گیراوەکە ژن بوو، نابێت پەیوەندی سێکسی لەگەڵ بکرێت هەتا رەحمی پاک نەکرێتەوە، بەڵام روون نییە مەبەستیان لە پاککردنەوەی رەحم چییە.
یاساکانی سێکس لە داعشدا هاوکات ژنە کۆیلەکان بە موڵکی خاوەنەکانیان دەزانێت و ئاماژە بەوە دەکات کە لەگەڵ مردنی خاوەنەکانیان وەک میراتی بۆ کوڕەکانیان دەمێننەوە.
نامیلکەکەی داعش لە لایەن چاپخانەی الحماقی رێکخراوەکەوە چاپکراوە و رۆژی 3-12-2014 بەسەر چەکداراندا دابەشکراوە.
