رووداو- هەولێر
سەرۆكی هەرێمی كوردستان تیشك دەخاتە سەر سەركەوتنە مەیدانییەكانی پێشمەرگە بەسەر داعشدا و رایدەگەیەنێ ، هێزەكانی پێشمەرگە بە سەركەوتنەكانیان سیحری تیرۆریستانیان بەتاڵكردەوە كە خۆیان بە هێزێك دەزانی كە هەرگیز ناشكێن.مەسعودبارزانی دەڵێت بۆ ئێمە جێگەی شانازییە كە لەجیاتی هەموو جیهان شەڕی ئەم تیرۆریستانە دەكەین و جەختیشدەكاتەوە كە هێزەكانی پێشمەرگە لە دۆخی هێرشبردندان و ئاماژەكانی رووخان و تێكشكانی داعش لەسەر دەستی پێشمەرگە بە روونی دەركەوتوون.
بەپێی هەواڵێكی ماڵپەڕی فەرمی سەرۆكایەتیی هەرێمی كوردستان، ئەمڕۆ پێنجشەممە 28 ی ئاب لە سەڵاحەدین، مەسعود بارزانی پێشوازی لە ژەنەڕاڵ سیر سیمۆن، نێردراوی تایبەتی ئاساییشی حكومەتی بریتانیا بۆ هەرێمی كوردستان و شاندێكی یاوەری كردووە. لەو دیدارەدا بارزانی ئاماژەی بۆ ئەوە كردووە كە تیرۆر هەڕەشەیەكە بۆ سەر هەموو لایەك و هیچ سنوورێك ناناسێ و لە هیچ شوێنێك ناگیرسێتەوە، بۆیە لەناوبردنی پێویستی بە هەوڵێكی دەولی و هەمە لایەنە و رێوشوێن و پلانی گشتگیر و نوێ هەیە.
پەیوەست بە بارودۆخی ئاوارەكان، بارزانی دووپاتیكردووەتەوە كە یارمەتیدانی خەڵكی لێقەوماو و پارستنیان لە هەڕەشەی تیرۆریستان بە ئەركێكی مرۆیی و نیشتمانی دەزانن و لەپێناو پاراستنی پێكهاتە نەتەوەیی و ئایینییەكانیش قوربانی و شەهیدیان داوە.
بارزانی ئاماژەی بەو ژمارە زۆرەی ئاوارەكان داوە كە روویان لە كوردستان كردووە و رایگەیاندووە كە كوردستان بە هەموو توانایەك یارمەتییان دەدات بەڵام ژمارە و ئاستی كارەساتەكە لە توانای كوردستان زیاترە، ئەوەیشی بۆ نێردراوی تایبەتی ئاساییشی حكومەتی بریتانیا باسكردووە كە "پێویستە خوشك و برا مەسیحییەكان و ئاوارەكان بیر لە جێهێشتنی وڵاتەكەیان نەكەنەوە و چارەسەری سەرەكییش لەوەدایە ناوچەكانیان ئازادبكرێت و یارمەتیی گەڕانەوە و نیشتەجێبوونیان بدرێت و لە هەڕەشەكانیش بپارێزرێن".
سەبارەت بە پڕۆسەی سیاسیی عێراقیش سەرۆكی هەرێمی كوردستان هێمای بەوەداوە كە پێویستە پڕۆسەی سیاسی تەنیا بە ئاراستەی گۆڕینی دەموچاو نەڕوات، بەڵكو لەگەڵ ئەوە دەبێ بەرنامە و سیستم و تەفكیری سیاسیی بگۆڕێت و حكومەتێك بە بەشداریی هەموو لایەك و لەسەر بنەمای شەراكەتی راستەقینە دابمەزرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ