رووداو - هەولێر
سۆران عومەر، پەرلەمانتاری كۆمەڵی ئیسلامی، باس لە نیازێكی بۆ هاویشتنی دەبە بۆ سەرۆكایەتی پەرلەمان دەكات، بەڵام وەك خۆی دەڵێ خۆشەویستیی بۆ سەرۆكی پەرلەمان رێگر بووە لەو كارە.
سۆران عومەر، پەرلەمانتاری كۆمەڵی ئیسلامی كوردستان دانیشتنی دوێنێ دووشەممەی پەرلەمانی كوردستانی بەجێهشت، بەهۆی ناكۆكییان لەگەڵ یوسف محەممەد، سەرۆكی پەرلەمانی كوردستان. بەڵام ئەو بە (تۆڕی میدیایی رووداو)ی راگەیاند "لەدوای دانیشتنەكە سەرۆكی پەرلەمانی كوردستان تەلەفۆنی بۆ كردووم و ئەمڕۆش لە سەرۆكایەتی پێكەوە دانیشتین و هیچ كێشەیەك نەماوە".
سۆران عومەر دەڵێت "من خۆم واژۆم كۆكردەوە بۆ گفتوگۆكردن لەبارەی قەیرانی ئابووری و قەیرانی مو‌وچەی فەرمانبەرانی هەرێمی كوردستان بۆ ئەوەی قو‌وتی خەڵك لە دانیشتنی پەرلەمان باس بكرێت، بەڵام سەرۆكی پەرلەمان ئەمەی خستە دەنگدانەوە و بە زۆرینەی دەنگ رەتكرایەوە و منیش دانیشتنەكەم بەجێهێشت".
سۆران عومەر، كە هاوكات سەرۆكی لیژنەی مافی مرۆڤی پەرلەمانە گوتی "سەرۆكی پەرلەمانی كوردستانم زۆر خۆشدەوێت و دەخوازم وەك گەنجێك سەركەوتووبێت ، بۆیە ئەگەر لەسەر ناهەق دەبە ئاوی تێبگیرێ ئەوا خۆم دەدەمە بەر دەبە ئاوەكە".
سۆران عومەر، پەرلەمانتاری فراكسیۆنی كۆمەڵی ئیسلامی لە لاپەڕەی تایبەتی خۆی لە تۆڕی كۆمەڵایەتی فەیسبو‌وك نو‌وسیویەتی "لەخولی سێیەمی پەرلەماندا رێك ئا لەم دۆخەی ئەمڕۆدا دەبە دەوەشێنرایە سەرۆكی پەرلەمان لەسەر قوتی خەڵك، بەڵام ئەمڕۆ سەرۆكایەتی پەرلەمان قسەكردن لەسەر قوتی خەڵكی خستە دەنگدان و ئەوانەی كە لافی كوردایەتی و بەرگری لەزمان و مێژووی كوردیان لێدەدا و 3 كاژێر خوتابیان پێشكەش كرد! دەنگیاندا بەوەی كە پەرلەمانتاران گفتوگۆ نەكەن لەسەر قوت و مو‌وچەی خەڵك" .
پەرلەمانتارەكەی كۆمەڵ ئاماژەی بەوەداوە "دڵم نەهات دەبە بگرمە د.یوسف، چونكە زۆرم خۆشدەوێت و ئاواتمە سەرۆكێكی زۆر سەركەوتوو بێت، بۆیە بەتەنها هاتمە دەرەوە و دانیشتنەكەم جێهێشت و پاش بەندەش كاك شوان قەڵادزێیی هەمان شتی كرد".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ