رووداو- هەولێر
عەرەب و توركمانەكانی كەركووك داوای دروستكردنی حەشدی شەعبیان لە حكومەتی عێراق كردووە.
رێبوار تەها، پەرلەمانتاری عێراق لە فراكسیۆنی یەكێتی بە تۆڕی میدیایی رووداوی راگەیاند، چەند لایەنێكی عەرەب و توركمانی كەركووك بە بیانووی شەڕی داعش داوای دروستكردنی میلیشیایان لە ژێر ناونیشانی حەشدی شەعبی كردووە، ئێمەش بە تووندی ئەو بابەتەمان رەتكردووەتەوە، چونكە كەركووك پێویستی بە هێز نییە و پۆلیس و پێشمەرگە سەروماڵی هەموو پێكهاتەكانی ئەو شارەیان پاراستووە. رێبوار تەها دەڵێت:" لە كەركووك بۆشایی ئەمنی نییە تا میلیشیا دروست بكرێت".
رێبوار تەها هەروەها دەشڵێت:" عەرب و توركمانەكان بە فەرمی ئەو داوایەیان لە حەیدەر عەبادی، سەرۆكوەزیرانی عێراق كردووە، ئەوەی ئێمەش هەستمان پێكردووە بەدەمەوەچوونێك لە لایەن بەغداوە بۆ دروستكردنی هێزی چەكدارو حەشدی شەعبی هەیە".
لە چەند رۆژی رابردوودا محەممەد خەلیل جبووری، ئەندامی ئەنجوومەنی پارێزگای كەركووك ئاشكرایكرد، كە سێ فەوجی چەكدارییان بۆ رووبەڕووبوونەوەی داعش ئامادەن و ئەركی هۆزە عەرەبیەكانیشە ناوچەكانیان لە ژێر دەسەڵاتی داعش دەربهێنن.
هەفتەنامەی رووداو لە ژمار 344 ی رۆژی 26ی كانوونی دووەمی 2015 لە سەر زاری ئاڵا تاڵەبانی، سەرۆكی فراكسیۆنی یەكێتی لە پەرلەمانی عێراق بڵاویكردەوە، كە مەسعود بارزانی، سەرۆكی هەرێمی كوردستان لە نامەیەكدا كە بۆ نوێنەرانی كورد لە بەغدا ناردوویەتی، داوای لێكردوون بەهیچ شێوەیەك رێگە بە دروستكردنی هێزی حەشدی شەعبی لە كەركووك و ناوچە جێناكۆكەكان نەدەن.



