رووداو-هەولێر
هەریەک لە پارتی دیموکراتی کوردستان و یەکێتی نیشتمانی کوردستان و حزبی شیوعی کوردستان هاوپەیمانێتییەکیان لە کۆمیسۆنی باڵای هەڵبژاردنەکانی عێراق تۆمارکردووە، بەڵام پارتی دەڵێت "ئەو هاوپەیمانییە نەماوە."
بەپێی نووسراوێکی کۆمیسیۆنی باڵای سەربەخۆی هەڵبژاردنی عێراق ، هەریەک لە یەکێتی ، پارتی و حیزبی شیوعی کوردستان هاوپەیمانێتییەکیان لە کۆمیسیۆن تۆمارکردووە بە ناوی هاوپەیمانی لیستی ئاشتی کوردستانی. بەپێی نووسراوەکەی کۆمیسیۆن، شێرکۆ محەممەد ساڵح، سەرۆک و ، ئیقباڵ شاکر مەحموود نوێنەری هاوپەیمانێتییەکەیە.
وەک لەنووسراوەکەدا هاتووە سەرۆکی ئەو حیزبانە بەمشێوەیە تۆمارکراون ، مەسعود مستەفا محەممەد ، سەرۆکی پارتی دیموکراتی کوردستان ، شۆڕش ئیسماعیل ، سەرۆکی یەکێتی نیشتمانی کوردستان و کاوە مەحموود سەرۆکی حیزبی شیوعی کوردستان.
خەسرەو گۆران، بەرپرسی دەزگای هەڵبژاردنی پارتی دیموکراتی کوردستان بە تۆڕی میدیایی رووداوی راگەیاند، ئەو هاوپەیمانێتییە پێشتر لە پارێزگای دیالە تۆمارکرابوو ، بەڵام ئێستا نەماوە و پارتی دیموکراتی کوردستان بڕیاریداوە لەو ناوچانە بەشداری هەڵبژاردن نەکات.
رۆژی دووشەممە 15-1-2018، ئەنجوومەنی سەرکردایەتی کەرکووک / گەرمیانی پارتی دیموکراتی کوردستان راگەیێندراوێکی لەبارەی بەشداریکردن یان نەکردنی لە هەڵبژاردنی پەرلەمانی عێراق بڵاوکردەوە و داوای لە هاونیشتمانیانی کوردی پارێزگاکە کرد بایکۆتی هەڵبژاردنەکان بکەن.
د. محەممەد خورشید، بەرپرسی لقی سێ-ی پارتی دیموکراتی کوردستان لە کەرکووک لەبارەی ئەو ناوچانەی بایکۆتەکەی پارتی دەیانگرێتەوە گوتی ، بڕیارەکە هەموو سنووری پارێزگای کەرکووک ، بەدرە، جەسان، مەندەلی، خانەقین، جەلەولا، قەرەتەپە، خورماتوو تاوەکو کەرکووک و پردێ دەگرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ